İspaniyanın “Espanyol” klubunun sol vingeri Naci Ünüvar La Liqa təmsilçisindən ayrılaraq yenidən Niderlanda qayıdıb.
Arena.az xəbər verir ki, 21 yaşlı futbolçu Niderlandın “Tvente” klubuna keçib.
Türkiyəli futbolçu yeni klubu ilə 2028-ci ilin 30 iyununa qədər müqavilə bağlayıb.
Xatırladaq ki, Naci Ünüvar Niderland nəhəngi “Ayaks”ın yetirməsidir. O, bu klubun əsas komandasında cəmi 3 oyun keçirib, 1 qol və 1 assistlə yadda qalıb.
Naci daha öncə də “Tvente”də çıxış edib. O, 2023/2024-cü illər mövsümündə bu klubun əsas komandasında 25 oyuna çıxıb, 4 qol və 3 məhsuldar ötürmə müəllifi olub.
Amsterdam nəhəngi Nacini 2022/2023-cü illər mövsümündə Türkiyənin “Trabzonspor” klubuna da icarəyə verib. Bu mövsümün əvvəlində isə Ünüvar icarə əsasında İspaniyanın “Espanyol” klubuna keçmişdi. O, bu mövsümün sonunadək icarədə olmalı idi. Amma “Tvente”dən gəlmiş sərfəli təklif onun İspaniyadan daha erkən ayrılması ilə nəticələnib. Türkiyəli futbolçu La Liqa təmsilçisinin heyətində cəmi 4 oyuna çıxıb və 1 məhsuldar ötürmə müəllifi olub.
Niderlandın aşağı yaş qrupları üzrə müxtəlif yığmalarında oynamış Ünüvar 2023-cü ilin mart ayında Türkiyənin U-21 yığmasında da debüt edib.
“Transfermarkt” internet-portalı 21 yaşlı müdafiəçinin transfer dəyərini 2 milyon avro məbləğində qiymətləndirir.
