“Səbail”in baş məşqçisi Cavid Hüseynov Azərbaycan Premyer Liqasının 19-cu turunda “Sumqayıt”a qarşı keçirdikləri oyunu şərh edib.
Arena.az xatırladır ki, paytaxt klubu səfər oyunundan 2:0 hesablı qələbə ilə ayrılıb.
Bu, “Səbail”in Cavid Hüseynovun gəlişindən bəri Premyer Liqada qazandığı ilk qələbədir. Gənc mütəxəssis matçdan sonra keçirilən mətbuat konfransında bunları söyləyib:
“Qış təlim-məşq toplanışından sonra ilk rəsmi oyunumuz idi. Qış fasiləsindən maksimum yararlanmağa çalışdıq. Çempionatdakı yerimiz çox təhlükəlidir. Bizə ümid verən oyun, komanda, futbolçular var. Şükürlər olsun ki, bu gün meydandan qələbə ilə ayrıla bildik. Bu gün bizə qələbə gətirən əsas məqamlardan biri təmkinli olmağımız idi. Bundan başqa müdafiədə səhvlər etməməyə çalışdıq”.
Cavid Hüseynov mövcud heyətin Premyer Liqada qalmaq üçün nə dərəcədə yetərli olması barədə sualı da cavablandırıb:
“Maliyyə sıxıntılarımız var. Daha bir neçə oyunçu transfer etmək istəyərdik. Bunun nə dərəcədə mümkün olacağını deyə bilmərəm. Amma güclənməyə ehtiyacımız var”.
“Sumqayıt”ın baş məşqçisi Vaqif Cavadov isə komandasının məğlubiyyətinə belə şərh verib:
“Məğlub olduq. Bu, normaldır. “Səbail”i təbrik edirəm. Rəqib sonuncu pillədə gedir. Onlarda istək daha çox idi. Ona görə də qalib gəldilər. Biz öz şanslarımızdan istifadə etmədik. Rəqib isə əlinə düşən şanslardan yaxşı istifadə etdi, qollar vurdu. Belə oyunlar olacaq. Bəzi futbolçuların təklifləri var. Bu da normaldır. Qış transfer pəncərəsi bitməyib deyə, bu söz-söhbətlər bəzi futbolçulara təsir edir. Yenə də oyuna görə uşaqlara təşəkkür edirəm. Heç nə itirilməyib. Növbəti matça hazırlaşacağıq”.
Vaqif Cavadov yeni transferlərin yolunu gözlədiyini bildirib:
“Hücum mövqeyinə oyunçular almalıyıq. İki hücumameyilli futbolçu gələcək. Transferlərdə gecikirik, amma bu, məndən asılı olmayan bir şeydir. Yaxşı futbolçu gətirmək üçün əlimizdən gələni edirik. Bir oyunçu bu gecə Bakıda olacaq. Hücumçudur. Elə-belə transferlər etmək istəmirik. Lazımlı futbolçunu tapmaq və bura gətirmək çox çətindir. Elə bir oyunçunu tapmışıq. Çalışacağıq ki, onu növbəti matça hazır edək”.
