Olaylar.az xəbər verir ki, bu barədə Sciencealert nəşri məlumat yayıb.
Alimlər adanın yaranmasını Xəzər dənizindəki palçıq vulkanının püskürməsi ilə əlaqələndirirlər.
"Müvəqqəti torpaq massivi ilk dəfə 1861-ci ilin may ayında sənədləşdirilib. Lakin bir ildən sonra ada yoxa çıxıb," - deyə məqalədə bildirilir.
Məlumata görə, XX əsr boyunca ada təxminən altı dəfə suyun səthində yaranıb və yoxa çıxıb. Adanın son dəfə üzə çıxması 2023-cü ilin yanvar ayında qeydə alınıb, lakin daha sonrakı peyk görüntülərində yalnız dar torpaq zolağı müşahidə edilib.
NASA-nın Landsat 8 və Landsat 9 peykləri, əvvəllər də adanın yaranmasını və yoxa çıxmasını qeydə almışdı. Tədqiqatçılar bildiriblər ki, adanın ən güclü püskürməsi 1950-ci ildə baş verib. Həmin vaxt adanın eni 700 metrə, hündürlüyü isə 6 metrə çatmışdı.
Alimlər əlavə ediblər ki, palçıq vulkanları yeraltı təzyiqin isti və axıcı maddələri, həmçinin qazları səthə çıxardığı ərazilərdə yaranır.
