Bakı, TurkicWorld
Yusuf Dikeç 1 yanvar 1973-cü ildə Kahramanmaraşın Göksun rayonunda anadan olub. Türkiyəli peşəkar atıcı atlet və Jandarma Baş Komandanlığında baş çavuş rütbəsinə sahib olan Dikeç, idman həyatını Jandarma Qüvvələri İdman Klubunda davam etdirib. O, tapança kateqoriyalarında həm milli, həm də beynəlxalq yarışlarda uğurlu çıxışları ilə tanınır.
Dikeç 2012-ci ildə Londonda keçirilən Yay Olimpiya Oyunlarında Türkiyəni 10 metrdən pnevmatik tapança və 50 metrdən tapança yarışlarında təmsil edib. Onun idman karyerasında növbəti mühüm uğuru 2013-cü ildə Mersində keçirilən Aralıq dənizi Oyunlarında gəlib. Burada o, qızıl və gümüş medal qazanıb.
2014-cü ildə İspaniyanın Qranada şəhərində keçirilən ISSF Bütün Növlər üzrə Dünya Atıcılıq Çempionatında Dikeç qızıl medal əldə edib. 2016-cı il Rio-de-Janeyro Yay Olimpiya Oyunlarında isə 50 metrdən tapança yarışında 550 xalla 22-ci sırada qərarlaşaraq , seçmə mərhələdən kənarda qalıb.
Yusuf Dikeç 2024-cü ilin aprel ayında Braziliyada keçirilən Olimpiya Təsnifat Çempionatında və Almaniyada keçirilən Dünya Çempionatında da qızıl medal qazanıb. Ancaq onun ən böyük uğuru Paris 2024 Yay Olimpiya Oyunlarında gəib. Partnyoru Şevval İlayda Tarhan ilə birlikdə qarışıq komanda yarışında çıxış edən Dikeç, finalda ikinci olaraq Türkiyəyə bu kateqoriyada ilk olimpiya medalını qazandırıb.
Dikeç, xüsusən özünəməxsus duruşu ilə sosial mediada geniş müzakirələrə səbəb olaraq, dünyada məhşurluq qazanıb. Onun atış tərzi və sadə idman avadanlıqlarından istifadəsi böyük maraq doğurub.
Adətən, atıcılıq yarışlarında linza, göz qapağı və qulaq qoruyucu kimi vasitələrdən istifadə edən idmançılardan fərqli olaraq, Dikeç bu vasitələrə üstünlük verməməsi ilə seçilib. Yarış zamanı tutduğu mövqe və özünəməxsus üslubu sayəsində Paris 2024-ün ən çox danışılan simalarından biri olub.
Bir çox məşhur idmançı, dünya ulduzları və jurnalistlər onun yarışlardakı soyuqqanlı və özünə inamlı çıxışını paylaşaraq, təqdir ediblər. Onun sadə və sakit üslubu, texniki dəqiqliyi və konsentrasiya qabiliyyəti sosial şəbəkələrdə böyük rəğbət toplayıb. Yusuf Dikeç Paris 2024 Olimpiadasında göstərdiyi performansla yalnız Türkiyədə deyil, bütün dünyada adından söz etdirməyi bacarıb .
Dikeçin karyerasında yeni hədəfi isə, sağlamlığı əl verdiyi müddətdə 2028 Los Anceles Olimpiadasında iştirak edərək, qızıl medal qazanmaqdır.
