"Keçən həftə Özbəkistanın 10-a yaxın universitetində müzakirələr apardıq".
AzEdu.az xəbər verir ki, bu sözləri Azərbaycan Dövlət İqtisad Universitetinin (UNEC) rektoru Ədalət Muradov rəsmi feysbuk hesabında qeyd edib.
Rektor Özbəkistanda da birgə magistr hazırlığına başlanılacağını bildirib:
"UNEC-in təhsil ixracı coğrafiyasını daha da genişləndirdik. Səfər çərçivəsində Özbəkistan ali təhsil sistemində baş verən dəyişikliklərin xüsusiyyətlərini və gələcək perspektivlərini də təhlil etməyə çalışdıq. Məlum olub ki, 40 universitetə akademik, idarəetmə və maliyyə muxtariyyəti verilib, 2016-cı ildə 75 olan universitet sayı hazırda 217-ə çatıb. Ali təhsilin əhatəsi 2016-cı ildə 9% idisə, bu gün 40%-ə yüksəlib və 2030-cu ildə 50%-ə çatdırılması planlaşdırılır. Həmçinin, 30-dan artıq xarici universitetin filialı fəaliyyət göstərir və bu sayın 2030-cu ilə qədər 45-ə çatdırılması nəzərdə tutulur"- deyə rektor qeyd edib.
