PSJ-nin qapıçısı Matvey Safonovun atası Yevgeni Safonov oğlunun Fransa nəhənginin düşərgəsindəki durumu ilə bağlı sualı cavablayıb.
Arena.az ata Safonovun bu barədə cavabını təqdim edir:
“Təəssüf ki, mən futbol mütəxəssisi deyiləm. Və məncə, söhbət mənimlə Matvey arasında olmalıdır. Mən isə bunu ictimaiyyətə açıqlamaq istəməzdim. Əgər Matvey PSJ-də bunu bəyənirsə və orada özünü rahat hiss edirsə, deməli, ən vacibi də budur. Onunla danışmışam, o, hər şeydən razıdır, indiyə qədər hər şey qaydasındadır. Bayramdan əvvəl onunla görmüşdük”, deyə Matvey Safonovun atası bildirib.
Xatırladaq ki, Matvey Safonov PSJ-yə 2024-cü ilin iyul ayında Rusiyanın “Krasnodar” klubundan keçib. Paris klubu bu transfer üçün 20 milyon avro ödəyib. 25 yaşlı qolkiperlə 5 illik (2029-cu ilin 30 iyununa qədər) müqavilə imzalanıb.
Safonov cari mövsümdə PSJ-nin heyətində 8 oyuna çıxıb. O, bu oyunlarda 6 qol buraxıb, 3 oyunda qapısını toxunulmaz saxlayıb.
“Krasnodar”ın yetirməsi olan Matvey Safonov 2019-cu ildən bu klubun əsas komandasında forma geyinməyə başlayıb. O, bu komandada 175 oyuna çıxıb, 208 qol buraxıb, 53 matçda qapısını toxunulmaz saxlayıb.
Rusiyanın müxtəlif yaş qrupları üzrə yığmalarında oynamış Safonov, 2021-ci ildən əsas millidə forma geyinir. O, Rusiya milli komandasında 14 oyuna çıxıb, 8 qol buraxıb, 9 matçdan “quru” qurtulub.
“Transfermarkt” internet-portalı 25 yaşlı rusiyalı qapıçının transfer dəyərini 22 milyon avro məbləğində qiymətləndirir.
