Bu gün beynəlxalq qrossmeyster Vüqar Həşimovun atası, Azərbaycan idmanının inkişafında əvəzsiz xidmətləri olan polkovnik Qasım Həşimov vəfat edib.
Qasım Murtuza oğlu Həşimov 1949-cu ildə Goranboy rayonunda anadan olub. Uzun illər Mərkəzi Ordu İdman Klubunun rəisi vəzifəsində çalışıb. Həmin illərdə Mərkəzi Ordu İdman Klubunda müxtəlif idman növlərinin inkişafında böyük xidmətləri olub.
Ailəlikcə idmana böyük sevgisi olan Qasım Həşimov oğlu – şahmat üzrə Avropa çempionu və müxtəlif beynəlxalq turnirlərin qalibi Vüqar Həşimovun Azərbaycanın və dünyanın ən güclü şahmatçılarından biri kimi formalaşmasında misilsiz rol oynayıb. Vüqarın şahmat karyerasında onunla birgə addımlayan Qasım Həşimov oğlunun ilk şahmat müəllimi kimi tanınıb.
Qasım Həşimov 2014-cü ildən keçirilən və Vüqar Həşimovun xatirəsinə həsr olunan şahmat üzrə superturnirin Təşkilat Komitəsinə rəhbərlik edib. 2016-cı ildə isə rəhbərlik etdiyi Vüqar Həşimov Şahmat Akademiyasını yaradıb.
Azərbaycanın əməkdar məşqçisi olan Qasım Həşimov 2023-cü ildə Azərbaycanda idmanın inkişafında uzunmüddətli səmərəli fəaliyyətinə görə Azərbaycan Respublikası Prezidentinin fərdi təqaüdünə layiq görülüb.
"CBC Sport" kollektivi adından Həşimovlar ailəsinə, Qasım Həşimovun yaxınları və doğmalarına dərin hüznlə başsağlığı verir, səbr diləyirik!
