Futbol üzrə İngiltərə Premyer Liqasında mübarizə aparan “Vest Hem” komandasının baş məşqçisi Xulen Lopeteqi istefaya göndərilib.
Arena.az xəbər verir ki, bu barədə İngiltərə klubunun mətbuat xidməti məlumat yayıb.
58 yaşlı mütəxəssis komandanın ambisiyalarına cavab verməməsi və hədəflərə uyğun gəlməməsi səbəbindən yola salınıb. İspanyalı mütəxəssislə yanaşı onun daha dörd köməkçisi London klubundan ayrılıb.
Xatırladaq ki, Lopeteqi 2024-cü ilin iyul ayında “Vest Hem”in baş məşqçisi təyin edilmişdi. O, Premyer Liqa təmsilçisini bütövlükdə 22 oyuna çıxarıb. “Vest Hem” bu görüşlərdə 7 qələbə, 5 heç-heçə və 10 məğlubiyyət görüb.
“Vest Hem” bu mövsüm İngiltərə Premyer Liqasında 20 oyuna topladığı 23 xalla 14-cü sırada qərarlaşıb. Komanda 6 qələbə qazandığı halda 5 heç-heçə edib, 9 məğlubiyyətə üzülüb.
Xulen Lopeteqi daha öncə İngiltərədə “Vulverhempton”a da rəhbərlik edib.
Lopeteqi məşqçilik karyerasına İspaniyanın U-17 yığmasında başlayıb. Daha sonra o, ölkəsinin U-19, U-20, U-21 və əsas millilərinə də rəhbərlik edib. Klub karyerasında isə Lopeteqi “Rayo Valyekano”, “Portu”, “Real” və “Sevilya”nı çalışdırıb.
