"Qəbələ" Premyer Liqa yolunda iri addımlarını atmaqdadır.
Bölgə komandası Birinci Liqanın arxada qalan 11 turundan sonra 29 xalla turnir cədvəlinin vahid lideridir.
Kaxaber Tsxadadzenin yetirmələri nəinki məğlub olmayıb, hətta qapısında qol belə görməyib.
Maraqlıdır, uzunmüddətli quru seriyanın sirri nədədir?
"Qəbələ"nin müdafiə xətti idealdır, yoxsa rəqiblərin hücum xətti çox kəsərsiz?
"Qırmızı qaralar"ın təcrübəli mərkəz müdafiəçisi Murad Musayev Sportinfo.az-a açıqlamasında sualımıza cavab olaraq bunları dedi:
"Məncə, komanda şəklində düzgün müdafiə olunuruq. Az səhv etməyə çalışırıq. Başqa xususi nəsə yoxdur. Sadəcə elə alınır ki, hələ qol buraxmamışıq. Futbolda bəzən belə də olur.
Yaxşı hücum xətti olan komandalar var. Məsələn, "İmişli"ni, "Karvan"nı deyə bilərəm. Meydanda təzyiq hiss olunur. Digər komandalarda da nəsə etməyə çalışan hücumçular var. Hələ ki, hər şey biz arzulayan kimi gedir".
XANOĞLAN
