“Nyukasl”ın isveçli hücumçusu Aleksandr İsak 2024-cü ilin dekabr ayı üçün İngiltərə Premyer Liqasının ən yaxşı oyunçusu seçilib.
Arena.az məlumat verir ki, bu barədə Premyer Liqanın rəsmi saytı məlumat yayıb.
İsak “Nyukasl”ın heyətində dekabrda keçirdiyi 6 oyunda 8 qol vurub, 2 məhsuldar ötürmə müəllifi olub.
Qeyd edək ki, İsak karyerasında ilk dəfə Premyer Liqada ayın ən yaxşı oyunçusu seçilib. Premyer Liqanın cari mövsümündə İsakdan öncə Erlinq Haland (“Mançester Siti”) avqustun, Koul Palmer (“Çelsi”) sentyabrın, Kris Vud (“Nottingem Forest”) oktyabrın, Məhəmməd Salah (“Liverpul”) isə noyabrın ən yaxşısı elan edilmişdi.
“Nyukasl” Premyer Liqanın 20 turundan sonra topladığı 35 xalla yarış cədvəlinin 5-ci pilləsində qərarlaşıb.
Xatırladaq ki, Aleksandr İsak 2022-ci ilin avqust ayından “Nyukasl”da çıxış edir. İngiltərə klubu həmin vaxt İsakın İspaniya təmsilçisi “Real Sosyedad”dan transferi müqabilində 70 milyon avro məbləğində xərc çəkmişdi.
İsak cari mövsümdə “Nyukasl”ın heyətində bütün yarışlarda 22 oyuna çıxıb. O, bu oyunlarda 15 qol vurub, 4 məhsuldar ötürmə verib.
İsveçli hücumçunun “Nyukasl”ın heyətində ümumi statistikası isə belədir: 89 oyun, 50 qol, 8 məhsuldar ötürmə.
Aleksandr İsak daha öncə “Real Sosyedad”, AİK, “Villem II”, “Borussiya” (Dortmund) klublarında da çıxış edib.
İsak 2017-ci ilin yanvar ayında debüt etdiyi İsveç yığmasının heyətində 50 oyun keçirib, 15 qol vurub, 6 məhsuldar ötürmə verib.
“Transfermarkt” internet-portalı 25 yaşlı isveçli hücumçunun transfer dəyərini 75 milyon avro məbləğində qiymətləndirir.
