Yanvarın 20-də andiçmə mərasimindən sonra Amerika Birləşmiş Ştatlarının tamhüquqlu prezidenti olacaq Donald Tramp Ukrayna münaqişəsini Kiyev üçün əlverişli şərtlərlə həll etmək niyyətindədir.
Turkustan.az xəbər verir ki, bunu Pentaqonun rəhbəri vəzifəsinə namizəd Piter Heqset ABŞ Konqresində onun yüksək vəzifəyə namizədliyinə baxılan Senatın Silahlı Qüvvələr Komitəsində keçirilən dinləmələrdə deyib.
“Donald Tramp açıq şəkildə bildirib ki, o, bu münaqişənin sona çatmasını istəyir. Biz bunun ukraynalılar üçün mümkün qədər faydalı olmasını istərdik”, – deyə o bildirib.
Heqsetin sözlərinə görə, onlar bu nizamlanmanın ukraynalılar üçün mümkün qədər faydalı olmasını istərdilər.
Pentaqon rəhbərliyinə namizəd həmçinin bəyan edib ki, Rusiya öz təsirini genişləndirməyə yönəlmiş addımlar atmaqda davam edir. ABŞ isə bu cəhdlərin qarşısını almalıdır.
Pentaqonun gələcək rəhbərinin çıxışını rusiyalı senator Aleksey Puşkov şərh edib. Onun sözlərinə görə, Pit Heqset Konqresdəki çıxışı zamanı gələcək ABŞ administrasiyasının Ukrayna məsələlərinə dair mövqeyinin üç bəndini formalaşdırıb.
Puşkovun sözlərinə görə, ABŞ Ukraynanı tərk etmək niyyətində deyil, lakin Tramp və komandası Ukraynanın xeyrinə inkişaf etməyən hərbi əməliyyatların dinamikasından xəbərdardır və əsassız gözləntilər yaratmaq istəmir. O hesab edir ki, Heqsetin sözləri ABŞ-nin yeni seçilmiş Prezidenti Donald Trampın Ukrayna münaqişəsinə son qoymaq kursunu davam etdirdiyini göstərir.
“Son zamanlar bəzi Amerika və Qərb siyasətçilərinin bəyanatları və hərəkətləri onu deməyə əsas verir ki, Donald Tramp Ukraynanın artıq uduzduğunu və ölkənin bölünməsinə razı olduğunu başa düşür”,-deyə Rusiya mətbuatı yazır.
Qərb jurnalistləri Ukraynanın ABŞ-nin seçilmiş prezidenti üçün niyə yük kimi göründüyünü təxmin etməyə çalışıblar. Mətbuatın yazdığına görə, Tramp Ukraynada baş verənlərlə sadəcə çox maraqlanmır və bu münaqişənin birbaşa ABŞ üçün strateji əhəmiyyəti barədə tam aydın məlumata malik deyil./cebheinfo.az/
