“Liverpul”un baş məşqçisi Arne Slot İngiltərə Premyer Liqasının 21-ci turunun “Nottingem Forest”lə səfər oyununu (1:1) şərh edib.
Arena.az “Liverpul”un rəsmi saytına istinadən, niderlandlı mütəxəssisin bu barədə qənaətini təqdim edir:
“Mən bu gün daha artığını istəyə bilməzdim. Çoxları ikinci hissəni qeyd edəcəklər və bu ədalətlidir – pis deyildi. Amma belə bir komanda ilə onun öz meydanında oynayanda… “Nottingem Forest” demək olar ki, hər oyunda əks-hücumlar edir. Bu gün 98 dəqiqə oyun zamanı biz yalnız bir əks-hücuma icazə verdik, amma təəssüf ki, bu, rəqibin qol vurması üçün kifayət etdi”, deyə Slot vurğulayıb.
Arne Slot “Nottingem Forest”i İngiltərə Premyer Liqasında qalibiyyətə iddialı hesab edib-etmədiyini də cavablayıb:
“Düşünmürəm ki, onlar yalnız uğura görə cədvəldə olduqları yerdədirlər. Hər biri çətin günlər keçirən yüksək səviyyəli komandalarla oynayıblar. “Nottingem Forest” artıq yüksək yerlər uğrunda mübarizə apara biləcəyini nümayiş etdirib. “Meşəçilər” zədəsiz keçinə bilsələr, mən inanıram ki, onlar çox xal itirməyəcəklər”, – “Liverpul”un rəsmi saytı niderlandlı mütəxəssisdən sitat gətirir.
20 oyundan 47 xalla “Liverpul” İngiltərə Premyer Liqasının yarış cədvəlinə başçılıq edir.
21 oyundan 41 xal toplamış “Nottingem Forest” isə yarış cədvəlinin 2-ci pilləsində qərarlaşıb.
