Bundan sevincli gün görməmişəm.
“Report” xəbər verir ki, bunu Cəbrayıla qayıdan keçmiş məcburi köçkün Məhəmmədəli İsayev deyib.
“Bundan sevincli gün görməmişəm. Sevincimi sözlə ifadə edə bilmirəm. Axır ki, torpağımızı gördük, gedirik yurdumuza. Allaha qurban olum, məni bundan sonra yaşatsa da sağ olsun, yaşatmasa da. Əsas odur ki, hər şeydən arxayınam. Bundan gözəl nə var?”, - o qeyd edib.
Keçmiş məcburi köçkün vurğulayıb ki, illərdir bu günü – Cəbrayıla qayıdacağını gözləyib: “İllərdir hər gecəmiz Cəbrayıl idi. Allah Ali Baş komandanımız İlham Əliyevi qorusun, şəhidlərimizə qəni-qəni rəhmət eləsin, qazilərimizə uzun ömür, can sağlığı versin. Uca Tanrı dövlətimizi, millətimizi qorusun.
Hərbçilərimiz Kəlbəcərdə və digər yüksəkliklərdədir. Xalqımız, Ordumuz daim bu zirvələrdə olsun”.
M.İsayev bununla yanaşı qeyd edib ki, Azərbaycan xalqı müharibə dəhşətlərini heç vaxt unutmayacaq: “Xocalıya da qayıdış baş tutdu. Xocalı faciəsi bizim sinə dağımızdır. Hamımız məcburi köçkün idik. Ancaq Xocalı faciəsinin vurduğu dağ heç vaxt sinəmizdən getməyəcək. Bu qələbə Azərbaycanın tarixindən heç vaxt silinməyəcək. Sıldırım qayalara dırmaşıb, Şuşanı işğaldan xilas edən oğullarımıza, qazilərimizə qurban olum”.
