Danimarkada dinozavr dövrünə aid 66 milyon illik fosilləşmiş qusma aşkar edilib. Bu maraqlı fosili yerli fosil ovçusu Piter Benik ölkənin şərqində YUNESKO-nun Dünya İrsi siyahısına daxil edilmiş Stevns Klint sahilindəki qayalıqda tapıb.Özünü fosil həvəskarı olaraq tanıdan Benik əhəngdaşı içərisində qeyri-adi görünən bəzi fraqmentlər tapıb. Müayinə zamanı bu parçaların dəniz ulduzu və dəniz kirpisi ilə qohum olan dəniz zanbaqlarına aid olduğu müəyyən edilib.Benik tapdığı parçaları Şərqi Zelandiya Muzeyinə aparıb. Araşdırmalar nəticəsində fosilləşmiş qusmanın dinozavrların yaşadığı Təbaşir dövrünün sonuna, yəni 66 milyon il əvvələ aid olduğu təsdiqlənib. O dövrdə yer kürəsində Tyrannosaurus və Triceratops kimi dinozavrlar yaşayırdı.Şərqi Zelandiya Muzeyinin paleontoloqu və kuratoru Jesper Milan BBC-yə bildirib ki, kəşf həqiqətən qeyri-adi olub və tarixdən əvvəlki qida zənciri haqqında mühüm ipuçları təqdim edib.Kurator bu kəşfin qədim dəniz ekosistemlərini daha yaxşı anlamağa kömək edə biləcəyini qeyd edib. "Bu tapıntı dinozavrlar dövründə Təbaşir dənizinin gündəlik həyatına bənzərsiz bir baxış təqdim edir" deyə Milan bildirib.Tapıntılar əvvəlcə yalnız yerli mətbuatla paylaşılsa da, tezliklə bütün dünyada böyük marağa səbəb olub. Milan, kəşfin nə qədər diqqətəlayiq olduğunu vurğulayaraq, "Bu, indiyə qədər tapılan ən məşhur qusma ola bilər" deyib.
