"Trampın "məcburi köçürmə" təklifi daimi mühacirətə çevrilə biləcəyi səbəbindən rədd edilir..."
ABŞ prezidenti Donald Trampın Yaxın Şərq üzrə xüsusi elçisi Stiv Vitkoff İsrailə gəlib. Onun səfəri İsrail baş naziri Benyamin Netanyahunun fevralın 4-də Vaşinqtona gözlənilən səfərindən bir neçə gün öncə baş tutub.
Moderator.az xəbər verir ki, bu barədə "Sky News Arabic" telekanalı məlumat yayıb.
Çərşənbə günü İsraildə ABŞ-ın Yaxın Şərq üzrə xüsusi nümayəndəsi Stiv Vitkoffun iştirakı ilə danışıqlar keçiriləcək. Görüşdə İsrail ilə HƏMAS arasında atəşkəs razılaşmasının həyata keçirilməsi və onun növbəti mərhələsi müzakirə olunacaq.
Vitkoff səfər öncəsi vurğulayıb ki, atəşkəs razılaşmasına əməl olunması vacibdir. Bu razılaşma 15 aylıq silahlı münaqişəyə son qoyub. Müqavilə çərçivəsində artıq HƏMAS tərəfindən saxlanılan yeddi girov və İsrail həbsxanalarında olan 300 fələstinli məhbus azad edilib. Yaxın günlərdə yeni məhbus mübadiləsinin baş tutacağı gözlənilir.
Atəşkəs razılaşması Qəzzaya humanitar yardımın artırılmasını da nəzərdə tutur. BMT-nin humanitar ofisi çərşənbə axşamı bildirib ki, yardımların həcmi xeyli genişlənib. Artıq daha əvvəl yardım işçiləri üçün əlçatan olmayan bölgələrə də yardımlar göndərilir.
Qəzzanın bərpası atəşkəsin son mərhələsinin əsas məqsədlərindən biridir. Lakin əsas sual bölgəyə kimin nəzarət edəcəyi ilə bağlıdır. Qəzzada 2007-ci ildən HƏMAS hakimiyyətdədir və gələcək idarəçilik məsələsi açıq qalır.
Təhlükəsizlik mənbələrinə istinadən "Sky News Arabic" bildirir ki, Tramp administrasiyası Fələstin Administrasiyasının müharibədən sonra Qəzzada hakimiyyətə qayıtmasını istəyir.
Bu məsələni Stiv Vitkoffun Səudiyyə Ərəbistanına səfəri zamanı Fələstin Azadlıq Təşkilatının baş katibi Hüseyn əl-Şeyxlə müzakirə etdiyi bildirilir. Hüseyn əl-Şeyx Vitkoffa bildirib ki, Ramallah Qəzza sakinlərinin qonşu ölkələrə köçürülməsinə qarşıdır.
Donald Tramp son günlər fələstinlilərin İordaniya və Misirə köçürülməsi ideyasını açıq şəkildə səsləndirir. Fələstin və ərəb ölkələri, o cümlədən Misir və İordaniya bu ideyanı qəti şəkildə rədd edir. Onlar qorxur ki, məcburi köçkünlər bu ölkələrdə daimi məskunlaşsınlar.
ABŞ-ın dövlət katibi Marko Rubio Misirin xarici işlər naziri Bədr Əbdülatti ilə telefon danışığı zamanı vurğulayıb ki, "HƏMAS-ın bir daha Qəzzanı idarə etməməsi və İsrail üçün təhlükə yaratmaması üçün müharibədən sonrakı planlaşdırma üzərində birgə işləmək vacibdir".
Son günlər Donald Trampın fələstinlilərin Qəzzadan çıxarılması ilə bağlı təklifləri kəskin tənqid edilir. Tramp böyük sayda fələstinlinin zorla İordaniya və Misirə köçürülməsi ideyasını bir neçə dəfə təkrarlayıb. Lakin bütün ərəb ölkələri, o cümlədən Misir və İordaniya bu planı rədd edərək, məcburi köçürmənin daimi mühacirətə çevriləcəyindən narahat olduqlarını bildirib.
