Orbeliani sarayında keçirilən mükafatlandırma mərasimi zamanı jurnalistlər Gürcüstan prezidentinin iqamətgahının mərasim zalından Aİ bayrağının yoxa çıxmasını müşahidə ediblər.
Oxu24.com xəbər verir ki, Pirveli telekanalının verdiyi məlumata görə, yeni prezident Mixail Kavelaşvili mitinqlərin sərt şəkildə yatırılmasına görə Qərb dövlətləri tərəfindən sanksiyaya məruz qalan Daxili İşlər Nazirliyinin rəhbərlərinin mükafatlandırılması mərasimi keçirib.
Tədbir onun andiçmə mərasimindən sonra prezident sarayında keçirilən ilk rəsmi tədbir idi.
Kavelaşvilinin fonunda yalnız Gürcüstanın dövlət bayrağı və prezident ştandartı olub. Eyni zamanda, əvvəlki prezident Salome Zurabişvili ənənəvi olaraq Aİ bayrağından istifadə edərək, ölkənin Avropa kursunu vurğulayırdı.
Müxalif siyasətçilər Aİ bayrağının yoxa çıxmasını simvolik jest kimi qiymətləndirirlər. Milli Hərəkatın deputatı Gia Caparidze bildirib ki, bu, hakimiyyətin indiki siyasətini əks etdirir: “Yəqin ki, tezliklə Gürcüstan bayrağını gizlədəcəklər, qalan isə Rusiya bayrağıdır”.
“Gürcü arzusu”nun parlament seçkilərindəki qələbəsini tanımayan Salome Zurabişvili Mixail Kavelaşvilini “Orbeliani sarayının müvəqqəti icarəçisi” adlandırıb və onu repressiv qanunları dəstəkləməkdə və etirazların dağıdılmasında iştirak edən insanları mükafatlandırmaqda ittiham edib.
Miri
