“Real”ın və Fransa yığmasının ulduz hücumçusu Kilian Mbappenin zədəsinin xüsusiyyəti haqda məlumat açıqlanıb.
Arena.az bu barədə “Real”ın rəsmi saytına istinadən məlumat verir:
“Real”ın tibb şöbəsi tərəfindən bu gün Mbappe üzərində aparılmış tibbi müayinələrdən sonra futbolçunun sol ayağında bud nahiyəsindən zədə aşkarlanıb. Onun vəziyyəti nəzarətdə saxlanılacaq”.
Xatırladaq ki, Çempionlar Liqasının 6-cı turunda “Atalanta”ya qarşı səfər oyunu (3:2) Kilian Mbappe üçün düşərli olmayıb, ulduz hücumçu zədələnərək, 36-cı dəqiqədə braziliyalı hücumçu Rodriqo ilə əvəzlənib.
Mbappe “Rayo Valyekano”ya qarşı oynamayacaq
“Real” Mbappenin zədədən bərpa müddəti haqda rəsmi açıqlama verməsə də, İspaniya mətbatında müvafiq xəbər yayılıb. Jurnalist Aranxa Rodrigesin əldə edib paylaşdığı məlumata görə, fransalı ulduz 10 gün müddətində yaşıl meydanlardan kənarda qalacaq. Mbappe “Rayo Valyekano” ilə İspaniya La Liqasının növbəti oyununda (14 dekabr) oynamayacaq.
Mbappe futbola Fransanın “Bondi” klubunda qədəm qoyub. Ardınca “Klerfonten”ə keçib, oradan isə “Monako”ya yol tapıb və böyük futbolda məhz “Monako” ilə debüt edib.
2015-2018-ci illərdə Knyazlıq klubunun əsas komandasında çıxış etmiş Mbappe, 2018-ci ilin iyulunda 180 milyon avro müqabilində PSJ-yə keçib. Kilian 2018-2024-cü illər aralığında Paris klubunun heyətində 307 oyuna çıxıb, 256 qol, 108 məhsuldar ötürmə ilə yadda qalıb. Vurduğu 256 qolla Mbappe PSJ tarixinin ən sərrast futbolçusudur.
Mbappe 2024-cü ilin iyul ayında PSJ-dən azad agent qismində ayrılaraq “Real”a keçib. “Kral klubu” fransalı hücumçu ilə müddəti 2029-cu ilin iyun ayının sonuna qədər qüvvədə olacaq müqavilə imzalayıb.
Cari mövsümdə Mbappe “Real”ın heyətində 21 oyuna çıxıb, 12 qol vurub, 2 məhsuldar ötürmə verib.
Mbappe hazırda kapitanı olduğu, 2017-ci ilin martında debüt etdiyi Fransa yığmasının heyətində 86 oyun keçirib, 48 qol vurub və 35 məhsuldar ötürmə verib. Kilian “xoruzlar”la 2018-ci ildə Rusiyada keçirilmiş dünya çempionatının (DÇ-2018) və UEFA Millətlər Liqasının (2021) qalibi olub.
Klub səviyyəsində Mbappe PSJ ilə 6 dəfə və “Monako” ilə 1 dəfə Fransa Liqa 1-in, 4 dəfə Fransa Kubokunun, 2 dəfə Fransa Liqa Kubokunun, 3 dəfə Fransa Super Kubokunun qalibi olub, həmçinin dəfələrlə müxtəlif fərdi mükafatlara layiq görülüb. “Real”la isə Mbappe UEFA Super Kubokunun (2024) qalibi olub.
“Transfermarkt” internet-portalı 25 yaşlı fransalı hücumçunun transfer dəyərini 180 milyon avro məbləğində qiymətləndirir.
