Ermənistanın baş naziri Nikol Paşinyanın dekabrın 13-də Avrasiya Hökumətlərarası Şurasının Rusiyada keçirilmiş sessiyasından bəzi hədiyyələrlə qayıtdığına dair məlumat yayılıb.
Modern.az xəbər verir ki, bu barədə “Joğovurd” qəzeti yazıb.
“Dekabrın 13-də baş nazir Nikol Paşinyanın sədrliyi ilə Moskvada Avrasiya Hökumətlərarası Şurasının növbəti iclası keçirilib və bu iclasda Nikol Paşinyan 3 ölkənin baş nazirindən ümumi dəyəri 1 milyon 358 dram olan bahalı hədiyyələr alıb”, - deyə qəzet qeyd edib.
Bildirilib ki, Rusiya baş naziri Mixail Mişustin Nikol Paşinyana 650 min 328 dram dəyərində “Qış nağılı” adlandırılan qab-qacaq dəsti və çay dəstgahı hədiyyə edib.
Mişustinin adından erməni baş nazirə verilən hədiyyələr “İmperator Farfor Zavodu”nda hazırlanıb.Dəstin üzərindəki rəsmləri məşhur rəssam Aleksey Vorobyoski çəkib.
Belə ki, müəllifin əsərləri Ermitajın, Rus Muzeyinin və Kuskovo Dövlət Keramika Muzeyinin kolleksiyalarında saxlanılır. Bu hədiyyə dəstinə daxil olan qabların üzəri miniatürlər, mənzərələr, nağıl səhnələri, bayram ab-havası və ornamentlərlə bəzədilib. Qab-qacaq dəstində 20 qab olub: 1 çaynik, 1 qənd qabı, 6 çay stəkanı, 6 kiçik boşqab, 6 böyük boşqab.
Nikol Paşinyan növbəti hədiyyəni Özbəkistanın baş naziri Abdulla Aripovdan alıb. Erməni baş nazirə əl işi olan və misdən hazırlanan “İçan kala” tablosu hədiyyə edilib. Hədiyyə 999 ədəd qızıl və mina daşı ilə üzlənib. Hədiyyənin ümumi dəyəri 627 min 733 dram olub.
Nikol Paşinyan Qırğızıstan Nazirlər Kabinetinin sədri Akılbek Japarovdan kətan rəsm əsəri də hədiyyə alıb. Qırğız ustaları yaratdığı rəsmdə Ağrı dağının ətəyində qədim Xor-Virap monastırının təsviri əks olunub. Hədiyyənin qiyməti 80 min 185 dram olub.
Qəzet yazır ki, Nikol Paşinyan aldığı hədiyyələrin adlarını və dəyərini Korrupsiyaya Qarşı Mübarizə Komissiyasının “Dövlət vəzifəsi və ya dövlət qulluqçusu olan şəxsin hədiyyə uçotu blankı”da qeyd edib.
“Belə çıxır ki, Nikol Paşinyanın səfəri Rusiya Federasiyası, Qırğızıstan və Özbəkistanın baş nazirlərinə baha başa gəlib”, - yazıda vurğulanıb.
A.Qorxmaz
