Bir neçə gün öncə “Sumqayıt” klubu ilə yeni müqaviləyə imza atmış Vaqif Cavadovun məşqçilər korpusu müəyyənləşib.
Arena.az xəbər verir ki, bu barədə sözügedən klubun mətbuat xidməti məlumat yayıb.
Xəbərdə bildirilir ki, 35 yaşlı mütəxəssisin köməkçiləri Şahin Abdullayev və uzun illər komandaya kapitanlıq etmiş Vurğun Hüseynov olacaqlar. Qapıçılar üzrə məşqçi vəzifəsini Emil Babayev yerinə yetirəcək. Fiziki hazırlıq üzrə məşqçi vəzifəsini isə Xerard Martines Bernat icra edəcək.
Xatırladaq ki, yanvarın 8-də “Sumqayıt”ın Müşahidə Şurasının növbəti iclasında Vaqif Cavadovun da aqibətinə aydınlıq gətirilib. 35 yaşlı mütəxəssislə yola davam etmək qərara alınıb. Toplantıda komandanın ötən ildə əldə etdiyi uğurlara toxunulub. Daha sonra komandanın müvəqqəti baş məşqçisi funksiyasını icra edən Vaqif Cavadovun işi qənaətbəxş hesab olunub və onunla daimi əsaslı müqavilə bağlanılması məqsədəuyğun hesab edilib. Cavadov “gənclik şəhəri” təmsilçisi ilə 2,5 illik müqaviləyə imza atıb.
Vaqif Cavadov ötən ilin oktyabr ayında Samir Abasovun istefasından sonra “Sumqayıt”a müvəqqəti baş məşqçi təyin edilmişdi. Həmin vaxta kimi bu klubun əvəzedicilərinə rəhbərlik edən Cavadov əsas komandanı 10 oyuna çıxarıb. “Sumqayıt” bu görüşlərdə 5 qələbə qazanıb, 1 heç-heçə edib, 4 məğlubiyyətə üzülüb.
Cavadov 2023-cü ilin aprel ayında “Sumqayıt”ın əvəzedicilərdən ibarət komandasının baş məşqçisi təyin olunmuşdu. O, futbolçu karyerası dövründə də bir mövsüm “Sumqayıt”ın şərəfini qoruyub.
“Sumqayıt”ın əsas komandası Azərbaycan Premyer Liqasının 2024/2025-ci illər mövsümünün geridə qalmış ilk iki dövrəsini 20 xalla 6-cı pillədə başa vurub. Cavadovun komandası keçirdiyi 18 oyunda 6 qələbə qazanıb, 2 heç-heçə edib, 10 məğlubiyyətə üzülüb. Komandanın top fərqi isə belədir – 15:26.
