Səudiyyə Ərəbistanının “Əl-İttihad” klubunun mərkəz müdafiəçisi Luis Felipe bundan sonra Marsel “Olimpik”inin formasını geyinəcək.
Arena.az bu barədə Fransa klubunun rəsmi saytına istinadən xəbər verir.
Əslən Braziliyadan olan italiyalı futbolçu “Əl-İttihad”dan azad agent kimi ayrılıb və “Olimpik”lə ilyarımlıq (2026-cı ilin 30 iyununa qədər) müqavilə imzalayıb.
Luis Felipe “Əl-İttihad”a 2023-cü ilin sentyabr ayında İspaniyanın “Betis” klubundan 22 milyon avroya keçmişdi. 27 yaşlı futbolçu Səudiyyə Ərəbistanı klubunun heyətində 28 oyuna çıxsa da, məhsuldar fəaliyyəti ilə diqqət çəkməyib.
Felipe daha öncə “Latsio”, “Betis”, “İtuano” və “Salernitana” kimi klublarda da forma geyinib.
Təcrübəli futbolçunun futboldakı əsas uğurları “Latsio” ilə bağlıdır. O, bu klubla bir dəfə İtaliya Kubokunun (2018/2019) və iki dəfə İtaliya Super Kubokunun (2017/2018 və 2019/2020) qalibi olub.
Luis Felipe vaxtilə Braziliyanın U-20 və U-23 yığmalarında oynasa da, 2022-ci ilin iyun ayında İtaliyanın əsas millisində debüt edib. O, İtaliya yığmasının heyətində cəmi 1 oyun keçirib.
“Transfermarkt” internet-portalı 27 yaşlı müdafiəçinin transfer dəyərini 8 milyon avro məbləğində qiymətləndirir.
