Cənubi Koreyanın Nəqliyyat Nazirliyi uçuş məlumatlarının qeydə alınmasının 179 nəfərin ölümü ilə nəticələnən Jeju Air qəzasından dörd dəqiqə əvvəl dayandırıldığını bildirib.
APA xəbər verir ki, bu barədə “The Guardian” məlumat yayıb.
Məlumata görə, Nəqliyyat Nazirliyi bildirib ki, dekabr ayında Cənubi Koreyada qəzaya uğrayan və 179 nəfərin ölümü ilə nəticələnən Jeju Air təyyarəsinin uçuş məlumatları və kokpit səs yazıcıları, təyyarənin Muan hava limanında beton konstruksiyaya çırpılmasından təxminən 4 dəqiqə əvvəl qeydləri dayandırıb.
Nazirlik qeyd edib ki, fəlakəti araşdıran səlahiyyətlilər, Cənubi Koreyada ən dəhşətli təyyarə qəzasında, qara qutuların qeydi dayandırmasına nəyin səbəb olduğunu təhlil etməyi planlaşdırır.
Nazirlik həmçinin bildirib ki, səs yazıcısı ilkin olaraq Cənubi Koreyada təhlil edilib və məlumatların əskik olduğu aşkar edildikdən sonra ABŞ Milli Nəqliyyat Təhlükəsizliyi Şurasının laboratoriyasına göndərilib. Zədələnmiş uçuş məlumat yazıcısı ABŞ-ın təhlükəsizlik tənzimləyicisi ilə birlikdə təhlil edilmək üçün ABŞ-a aparılıb.
