Azərbaycan futbolunun yeni gündəmi AFFA-nın ötən həftənin sonunda açıqladığı İnkişaf Strategiyasının layihəsidir. Sosial şəbəkələr, media, futbol mütəxəssisləri, azarkeşlər, bir sözlə hər kəsin dilində yeni strategiyadır.
70 səhifədən ibarət olan elektron layihə əslində yekun strategiya deyil. Arzu edənlər rəy və təkliflərini 2025-ci il yanvarın 13-ü saat 12:00-a qədər bildirə bilər.
Geridə qalan günlər ərzində artıq ilkin rəylərlə tanış olmuşuq. Təbii olaraq fikirlər, yanaşma müxtəlifdir. Ancaq hər kəsi maraqlandıran bir sual var – Bu strategiya həqiqətən reallaşacaqmı? Yoxsa son 30 ildəki layihələr kimi kağız üzərində qalacaq?
Elə bu məqamı nəzərə alaraq tanınmış futbol funksioneri Yaşar Sultanova müraciət etdik. Azərbaycan futbolu ilə bağlı böyük təcrübəyə malik olan Sultanov strategiyanı tənqid etdi. O, layihəni “məclis sağlığı”na bənzətdi:
“AFFA-nın təqdim etdiyim layihəni oxudum. Onlar buna layihə deyirsə, mən buna sadəcə “məclis sağlığı” deyərdim. Orada çox şey yazılıb. Bu yazılanları hamımız bilirik. Orada yeni bir şey yoxdur. Amma layihə, strategiya olaraq heç nə təqdim olunmayıb. Orada hansısa dövlət qurumunun, bələdiyyələrin, icra orqanlarının adı çəkilməyib. Kiminlə nə kimi işlərin görüləcəyi, kimin tərəfindən təqdim ediləcəyi qeyd olunmayıb. Əslində, belə layihələr Prezidentin nəzarətində və onun tapşırıqları əsasında hazırlanmalıdır. Bu işdə dövlət qurumları birgə çalışmalıdır. Ölkədə stadion demək olar yoxdur. Yeni stadionların, meydançaların tikintisi üçün torpaqlar lazımdır. Torpağı ayıran qurum bələdiyyələr və icra orqanlarıdır. Ermənistanda Nazirlər Kabineti 3 il ərzində 500 futbol meyndançasının salınacağını açıqlayıb. Onların 2-3 milyon əhalisi var. Bizdə bu rəqəm 5 dəfə çoxdur. Deməli bizdə salınacaq meydançanın sayı da 5 dəfə çox – 2500 olmalıdır. 2500 bir yana qalsın, heç 20-si salınmır.
Futbol bölgələrdə olmalıdır. Stadionlar, bazalar, akademiyalar, meydançalar rayonlarda salınmalıdır. Hər kəndin öz stadionu, meydançası yoxdursa, qonşu kəndlərin arasında rəqabətli futbol matçları olmursa, kənddəki uşaqlar bunu görmürsə, oradakı uşaqlarda futbola sevgi olmayacaq. Maşın yoxdursa, sürücü olmağı haradan öyrənə bilər? Azərbaycanın 66 rayonu var. Onlardan cəmi 10-12-də futbola yararlı stadion var. Bu, belə olmamalıdır. Nazirlər Kabineti geniş şəkildə proqram hazırlamalıdır. İşlər birbaşa Prezidentin nəzarətində olmalıdır.
Gürcüstanın 2 futbolçusu Avropanın ən yaxşıları sırasında yer almışdı. Deyirlər ki, biz “top-20” klublar arasına girməyi planlaşdırırıq. Necə? Klubların dəyərinin 2 dəfə artırılacağını deyirlər. Necə artıracaqlar? Onu başa salan yoxdur. Bunların heç birinin açıqlaması yoxdur. Yenə özümüz özümüzü aldadırıq? Son dərəcə yarımçıq proyektdir. Strategiya demək olmaz. Bayaq dediyim kimi, “məclis sağlığı”na oxşayır.
Bundan əvvəlki federasiya rəhbərliyinin dönəmində futbolun inkişafına dair 10 illik dövlət proqramı hazırlanmışdı. Proqram AFFA-nın ixtiyarına verildi. AFFA necə işlədi, nəticələr necə olduğunu hamımız bilirik. Bu, belə olmalı deyil. Birbaşa Prezidentin, idarəetmə qürumlarının iştirakı ilə dövlətin nəzarəti altında strateji plan hazırlanmalıdır. Müvafiq dövrlərdə hesabat verilməlidir. Orada açıqlanmalıdır ki, harada neçə stadion, futbol meydançası salınmalıdır. Hesabat verilməldir ki, filan vaxta qədər bunları etmişik, filan vaxta qədər də qalanların edəcəyik. Siz jurnalistlər də gedib onları işıqlandırmalısınız. Nədənsə jurnalistlərdən çox qorxurlar. İcraiyyə Komitəsində belə jurnalist olmalıdır. Çünki AFFA ictimai qurumdur.
Orada yazılanlar 30 il əvvəl yazılanlarla eynidir. Yeni heç nə yazılmayıb. Ümumi fikirlər, sözlərdir. Bu vaxta kimi harada yazılmayıb ki, məşqçilər, futbolçular inkişaf etdirilməsin? Bir dənə rəqəmlər qeyd olunub. Milli 75 komandanın içərisinə düşsün, klublar da UEFA reytinqində “ilk-20”-liyə girsin. Bir də klubların dəyərinin artırılmasıdır. Məni futbol nümayəndəsi kimi maraqlandırır ki, klubların dəyəri nəyin hesabına artacaq? Belə çıxır ki, bahalı legioner gətirəcəklər. Buna ehtiyac varmı?”
