Çin neft şirkətləri və neft emalı zavodları Rusiya və İrana qarşı sanksiyalara görə neft tədarükündə fasilələr gözlədikləri üçün təcili olaraq Yaxın Şərq, Afrika və Amerikadan yanacaq almağa qərar veriblər.
Hit.az xəbər verir ki, bu barədə Bloomberg treyderlərə istinadən yazır.
Sözügedən şirkət və müəssisələrə Cnooc, Yulong Petrochemical və Jiangsu Eastern Shenghong daxildir. Agentliyin məlumatına görə, onlar indi xam neftin təcili alınması üçün sorğular göndərirlər.
Bloomberg mənbələri qeyd edir ki, Çin Yaxın Şərq, Afrika, Şimali və Cənubi Amerika ölkələrindən “qara qızıl” idxal etməyi düşünür. Çin şirkətləri tərəfindən ən çox tələb olunan çatdırılma tarixi fevral ayıdır.
Məqalədə qeyd edilir ki, Çinin fəaliyyəti Rusiya və İrandan ucuz yanacağa çıxış imkanlarının məhdud olması səbəbindən uzun müddətdir ki, gəlirlərinin azalması ilə üzləşən kiçik neftayırma zavodlarında məhsuldarlığın azalması ilə bağlı narahatlıqlardan qaynaqlanır. Əgər uğursuz olarsa, əsas oyunçular daxili yanacaq çatışmazlığının qarşısını almaq və Çinin enerji təhlükəsizliyini təmin etmək üçün müdaxilə etmək niyyətindədirlər.
Yanvarın 14-də Reuters agentliyi Rusiya neftini dünya üzrə daşıyan 65 tankerin sanksiyalara görə lövbər saldığını bildirib.
Yanvarın 10-da ABŞ Rusiyadan karbohidrogenlərin daşınması ilə məşğul olan, həmçinin Sovcomflot və Qazpromneft ilə əlaqəli olan 100-ə yaxın gəmiyə məhdudiyyətlər qoyub. Bloomberg Rusiya ilə enerji ticarətinə tətbiq edilən bu sanksiyaları son zamanlar ən aqressiv adlandırıb.
Samir
