İran prezidenti Məsud Pezeşkian NBC kanalının əməkdaşı Lester Holta müsahibəsinə verib. Bu barədə İran Prezident Administrasiyasının kommunikasiya və informasiya üzrə müavini Seydi Mehdi Təbatəbai dünən “X” hesabında paylaşım edib.
“Məsud Pezeşkianın məşhur amerikalı aparıcı Lester Holtla müsahibəsində verdiyi “vacib mesajı” bu gün NBC kanalında yayımlanacaq. İran “bölgədə və dünyada sülh və gərginliyin azaldılmasına çağırır, “sionist rejimin” müharibə və qızışdırmasını, hücumlarını və soyqırımını pisləyir, eyni zamanda şərəfli və bərabərhüquqlu danışıqlara hazırdır”, – deyə Təbatəbai bildirib.
Pezeşkian aparıcı Lester Holtla NBC kanalına müsahibəsində deyib ki, “İslam Respublikası ABŞ-da prezident seçkiləri zamanı Donald Trampa sui-qəsd cəhdi etməyib və gələcəkdə də etməyəcək”.
Məlumata görə, müsahibədə Məsud Pezeşkian İranın ABŞ-nin indiki və ya keçmiş rəsmilərinə sui-qəsd cəhdində hər hansı əli olduğunu dərhal yalanlayıb. O, bildirib ki, bu, “İsrail və digər ölkələrin İran qorxusu yaratmaq məqsədi ilə həyata keçirdikləri cəhddir”.
Bir müddət öncə ABŞ Ədliyyə Nazirliyi SEPAH-ın 51 yaşlı Əfqanıstan vətəndaşı Fərhad Şakəriyə Donald Trampa sui-qəsd planı hazırlamaq tapşırığını verdiyini açıqlayıb.
ABŞ rəsmiləri bildiriblər ki, bu plan İranın 2020-ci ildə İraqda dron zərbəsi nəticəsində öldürülən SEPAH-ın Qüds qanadının komandanı Qasım Süleymaninin qisasını almaq səylərinin bir hissəsidir.
“Araz News” bu xəbərə reaksiya verib: “İranda ölkənin xarici siyasətinin istiqamətini müəyyən edən fars-molla rejiminin ali rəhbəri Əli_Xameneyidir, prezidentlər və xarici işlər nazirləri isə onun göstərişlərini yerinə yetirən şəxslərdir. Xameneyi ötən həftə etdiyi çıxışında bəyan edib ki, İran rəsmiləri ABŞ və israillilərin tələblərini heç bir şəkildə nəzərə almamalı və danışıqlar aparmaq üçün onların siyasətindən qorxmamalıdırlar”.
