Rusiya Müdafiə Nazirliyi Ukraynanın təbii qaz və enerji infrastrukturuna yüksək dəqiqlikli silahlar və pilotsuz uçuş aparatları (PUA) ilə hücum edildiyini açıqlayıb. Nazirlikdən verilən bəyanatda Rusiya ordusunun fəaliyyəti ilə bağlı məlumat verilib.
Bəyanatda deyilir ki, rus qoşunları cəbhədə mövqelərini yaxşılaşdıraraq Donetsk vilayətinin Ukrayinka qəsəbəsini ələ keçirib.
"Rusiya Silahlı Qüvvələri bu gün səhər saatlarında Ukraynanın hərbi-sənaye müəssisələrinin fəaliyyətini təmin edən mühüm təbii qaz və enerji infrastrukturuna yüksək dəqiqlikli silahlar və PUA-lardan istifadə etməklə hücum edib. Bütün hədəflər uğurla vurulub" – deyə bəyanatda vurğulanıb. Bəyanatda həmçinin 2022-ci ilin fevral ayından etibarən Ukrayna ordusuna məxsus 652 təyyarə, 283 helikopter, 40.480 PUA, 590 hava hücumundan müdafiə sistemi, 20.539 tank və zirehli texnika, 1.509 reaktiv yaylım atəşi sistemi, 20.630 minaatan və 30.305 xüsusi hərbi texnikanın məhv edildiyi qeyd olunub.
Rusiya Müdafiə Nazirliyi dünən Ukraynanın Qərb istehsalı olan ATACMS və "Fırtına kölgəsi" qanadlı raketlər ilə Rusiyanın Bryansk bölgəsinə hücum etdiyini və buna adekvat cavab veriləcəyini də açıqlayıb. Keçən il ABŞ və Böyük Britaniyanın Ukraynaya Rusiya ərazisini uzaq mənzilli silahlarla vurmağa icazə verdiyi bildirilmişdi.
