Azərbaycan Premyer Liqasının 19-cu turu çərçivəsində keçiriləcək “Qarabağ” – “Şamaxı” matçının biletləri sabah satışa çıxarılacaq.
Arena.az bu barədə Ağdam klubunun mətbuat xidmətinə istinadən xəbər verir.
Xəbərdə bildirilir ki, biletlər yanvarın 16-da saat 12:00-dan etibarən satışda olacaq. Biletlərin qiyməti sektorlara uyğun olaraq dəyişir. Belə ki, biletlərin qiyməti isə 3, 7 və 15 manat aralığındadır.
Biletlər sabahdan etibarən iTicket.az-da onlayn, oyun günü isə həm iTicket.az-da onlayn, həm də Tofiq Bəhramov adına Respublika stadionunun kassalarında da satışda olacaq.
Açıqlamada o da vurğulanır ki, qapılar azarkeşlər üçün matçın start fitindən 120 dəqiqə əvvəl açılacaq.
Qeyd edək ki, “Qarabağ” – “Şamaxı” matçı yanvarın 17-də Tofiq Bəhramov adına Respublika stadionunda keçiriləcək. Oyuna saat 19:00-da start veriləcək.
