Rusiya ordusu Ukraynada cəbhə xəttinin heç bir istiqamətində strateji məqsədinə nail ola bilməyib.
“AzPolitika” xəbər verir ki, bunu Ukrayna Silahlı Qüvvələrinin Baş Komandanı, general Aleksandr Sirski öz “teleqram” kanalında ABŞ Silahlı Qüvvələrinin Birləşmiş Qərargah Rəisləri Komitəsinin sədri, general Çarlz Braunla telefon danışığından sonra yazıb.
Sırski qeyd edib ki, cəbhədə şiddətli döyüşlər davam edir: "Söhbət əsnasında mən amerikalı həmkarıma cəbhə xəttindəki vəziyyət barədə məlumat verdim ki, bu da əksər bölgələrdə şiddətli döyüşlərin getməsi ilə xarakterizə olunur. Ukrayna hərbçilərinin şücaəti sayəsində düşmənin üstün qüvvələri cəbhənin heç bir istiqamətində strateji hədəfə nail ola bilməyib”.
Sirski general Brauna "xüsusən hava hücumundan müdafiə sistemləri, ağır texnika, artilleriya və aviasiya sursatlarının çatdırılması baxımından maddi-texniki yardımın göstərilməsi sahəsində müsbət dinamikaya görə" təşəkkür edib: “ABŞ Silahlı Qüvvələrinin Birləşmiş Qərargah Rəisləri Komitəsinin sədri əmin edib ki, Ukrayna əsgərlərinin müqaviməti ABŞ tərəfindən effektiv şəkildə dəstəklənməyə davam edəcək”.
“AzPolitika.info”
