Azərbaycan Premyer Liqasında II dövrə start götürdü. İlin ilk oyununda lider “Qarabağ” “Şamaxı” üzərində əzmkar qələbəyə sevindi – 3:2.
Matçdan öncə Qurban Qurbanovun yetirmələrinin rahatlıqla qələbə qazanacağı proqnozlaşdırılsa da, “Şamaxı” yaxşı müqavimət göstərməyi bacardı. Ayxan Abbasovun yetirmələri erkən qol buraxmalarına baxmayaraq, reaksiya verə bildi və 10 dəqiqəyə hesaba tarazlıq gətirdi. Qoldan sonra yenidən hücumlarını artıran “Qarabağ” bir daha önə keçsə də, fasiləyə qədər üstünlüyünü qoruya bilmədi. “Şamaxı”nın futbolçusu Brahim Konate rəqib müdafiəsindəki boşluqdan maksimum yararlanmağı bacardı və ilk qoldakı səhvini düzəltmiş oldu.
İkinci hissə hər iki tərəf ara-sıra hücumlar etsə də, sürətli oyunun şahidi olmadıq. Komandalar qış fasiləsindən yeni çıxıb və aşağı templi oyunlar gözləniləndir. Buna baxmayaraq, “Qarabağ” oyunun sonlarına yaxın təzyiqi artırmaqla üç xalı gətirən qolu vurdu. Bu dəfə isə yenə “Şamaxı”nın bir futbolçusu diqqət mərkəzinə düşdü. Yeni transfer Cəlal Hüseynov Premyer Liqada “şirlər”lə debüt matçında uğursuzluqla yadda qaldı və avtoqol müəllifi oldu. Bu, həm də oyunda sonuncu qol idi.
Heyətində daha çox yeni transferləri olan “Şamaxı” pis təsir bağışlamadı. Ayxan Abbasovun yetirmələri matçdan bir xalla da ayrıla bilərdi. Sadəcə bəzi epizodlarda yanlış qərarlar və rəqib qapıçı Şahruddinin etibarlı oyunu onların fərqlənməsinə imkan vermədi. Buna baxmayaraq, komanda növbəti oyunlarçün ümid verdi.
“Qarabağ” isə daha çox Avropa Liqasında növbəti həftə “Styaua”ya (Rumıniya) qarşı keçiriləcək oyuna köklənmiş göründü. Çox güc sərf etmədən üç xal qazanmağı hədəfləyən “atlılar” istəyinə nail oldu. Buna baxmayaraq, müdafiədəki problemlər həll edilməyib və sadə səhvlər komandanın təhlükə yaşamasına səbəb olur. “Styaua”nın hücumda daha keyfiyyətli və sürətli oyunçuları var, belə səhvlər Avropada bağışlanmır. “Qarabağ”ın “Styaua” ilə oyunu yanvarın 23-də Tofiq Bəhramov adına Respublika stadionunda keçiriləcək.
“Atlılar” bundan sonra çempionatda “Turan Tovuz”u qəbul edəcək. Sıx qrafikdə olan “Qarabağ” bu periodu maksimum yaxşı nəticə ilə keçməyi hədəfləyir. “Şamaxı”nı isə növbəti turda “Zirə” ilə ev sınağı gözləyir.
Şahin Cəfərov
