Müxalif deputat Artur Xaçatryan və “Ana Ermənistan” hərəkatının lideri Andranik Tevanyanın açıqlamalarına görə, Ermənistan hökuməti İlham Əliyevin irəli sürdüyü üç əsas tələbi qəbul edib:
1. Minsk Qrupunun fəaliyyətinə son qoyulması tələbi ilə ATƏT-ə müraciət
Ermənistanın ATƏT-in Minsk Qrupunun buraxılması ilə razılaşması bölgədə uzun illər ərzində davam edən diplomatik prosesin sonu kimi qiymətləndirilir. Bu, Azərbaycan tərəfinin tələb etdiyi və dəstəklədiyi bir məsələdir.
2.Konstitusiya dəyişikliyi
2026-cı ildə Konstitusiyanın dəyişdirilməsi ilə bağlı addımın İlham Əliyevin tələbi əsasında olduğu iddia edilir. Ermənistan Konstitusiyasında mümkün dəyişikliklərin Paşinyan hökumətinin səlahiyyətlərinin uzadılması və ya regionun gələcək statusu ilə bağlı ola biləcəyi ehtimal olunur.
3.Tavuş bölgəsində ərazilərin qaytarılması
Ən ciddi iddialardan biri isə Tavuş istiqamətində bəzi ərazilərin Azərbaycana qaytarılmasıdır. Bu ərazilər arasında sərhəd xətti boyunca strateji yüksəkliklərin və ya mövqelərin Azərbaycana verilməsi ehtimalı müzakirə olunur. Əgər bu baş verərsə, Azərbaycan-Ermənistan sərhədlərinin delimitasiya və demarkasiyası prosesində yeni reallıqların formalaşacağı gözlənilir.
Tavuş ərazisində hansı bölgələrdən söhbət gedə bilər?
Tavuş bölgəsi Azərbaycanla sərhəddə yerləşir və burada strateji yüksəkliklər mövcuddur. Əsas müzakirə mövzusu sərhəd xəttinin delimitasiyası zamanı müəyyən yerlərin dəyişdirilməsi ola bilər. Ermənistanın Tavuş bölgəsindəki bəzi kəndlərin və yüksəkliklərin Azərbaycanın nəzarətinə keçməsi ehtimalı bölgənin strateji balansını dəyişə bilər. Bu ərazilər xüsusilə Azərbaycanın Qazax rayonunun işğal altındakı 7 kəndi və sərhəd xəttindəki strateji yüksəkliklər ola bilər.
“Ana Ermənistan” hərəkatının lideri Andranik Tevanyan Nikol Paşinyanın və hökumət nümayəndələrinin Qarabağdakı separatçıların məhkəməsi ilə bağlı heç bir mövqe bildirməməsini də Cənab Prezident İlham Əliyevin tələblərindən birinin yerinə yetirilməsi kimi dəyərləndirir. Bu, Ermənistan hökumətinin Azərbaycanla qarşıdurmadan qaçmaq üçün mülayim siyasət yürütməsi kimi də qəbul edilə bilər.
Azərbaycan tərəfi hakl olaraq, uzun müddətdir ki, sərhədlərin tanınmasını və işğal altında olan ərazilərin qaytarılmasını tələb edir. Əgər Tavuş istiqamətində ərazilərin Azərbaycana qaytarılması baş verərsə, bu, regionda sülh prosesinə mühüm təsir göstərə bilər. Belə görünür ki, Nikol Paşinyan əlacsız qalıb sonda Azərbaycan prezidenti İlham Əliyevin tələblərini yerinə yetirməli olacaq.
