Misirli mərkəz hücumçusu Ömər Marmuş Frankfurt “Ayntraxt”ından ayrılaraq tamhüquqlu əsasda “Mançester Siti”yə keçib.
Arena.az bu barədə İngiltərə klubunun rəsmi saytına istinadən məlumat verir.
Keçid “şəhərlilər”ə 75 milyon avro məbləğ müqabilində başa gəlib. Misirli futbolçu İngiltərə klubu ilə müddəti 2029-cu ilin iyun ayının sonuna qədər qüvvədə olacaq müqavilə imzalayıb. Marmuş “şəhərlilər”in heyətində “7” nömrə altında çıxış edəcək.
“Marmuş Avropa futbolunun ən çox ehtiyac duyulan gənc hücumçularından biridir, hücumun hər iki cinahında oynamağa qadirdir”, – “Mançester Siti”nin rəsmi “mədhiyyəsində” deyilir.
Mərkəz hücumçusu olan Ömər Misirin “Vadi Deqla” klubunun yetirməsidir. Misirli futbolçu daha əvvəl “Volfsburq”, “Sankt Pauli”, “Ştutqart” və Frankfurt “Ayntraxt”ında çıxış edib.
Marmuş cari mövsümün birinci yarısında “Ayntraxt”ın heyətində 26 oyuna çıxıb, 20 qol vurub, 14 məhsuldar ötürmə müəllifi olub.
Marmuşun Frankfurt klubunda çıxışının ümumi mənzərəsi 67 oyun, 37 qol, 20 məhsuldar ötürməsən ibarətdir.
Ömər Marmuş 2021-ci ilin oktyabr ayında debüt etdiyi Misir yığmasının heyətində 35 oyuna çıxıb, 6 qol vurub, 3 məhsuldar ötürmə verib.
“Transfermarkt” internet-portalı 25 yaşlı misirli mərkəz hücumçusunun transfer dəyərini 60 milyon avro məbləğində qiymətləndirir.
Yeri gəlmişkən, “Mançester Siti” sol cinah müdafiəçisi Coş Uilson-Esbrandı “Stok Siti”yə icarəyə verib. 22 yaşlı futbolçu bu mövsümün sonunadək icarədə olacaq, yayda isə Mançester klubunun düşərgəsinə qayıdacaq.
“Vest Hem”in yetirməsi olan Coş, 2019-cu ildən “Mançester Siti”nin düşərgəsindədir. O, “şəhərlilər”in əsas komandasında cəmi 3 oyuna çıxıb, 1 assistlə yadda qalıb. Uilson-Esbrand əvvəlki illərdə “Koventri Siti”, “Reyms”, “Kardiff Siti” kimi klublarda da icarədə olub. O, İngiltərənin U-18, U-20 və U-21 yığmalarında da çıxış edib.
“Transfermarkt” internet-portalı 22 yaşlı müdafiəçinin transfer dəyərini 4 milyon avro məbləğində qiymətləndirir.
