Eks-deputat Əsabil Qasımovun şirkətləri cərimələnir

Sabiq dedputatlardan Əsabil Qasımova məxsus iki böyük şirkətin gömrük qaydalarını kobud şəkildə pozduğu məlum olub.

Tribunainfo.az xəbər verir ki, “Karat Holding” MMC və “Karmen” MMC İnzibati Xətalar Məcəlləsinin 485.2-ci maddəsini pozub. Tələbi pozulan maddəyə əsasən, Azərbaycan Respublikasının Gömrük Məcəlləsi ilə müəyyən edilmiş hallarda qısa idxal bəyannaməsinin mallar gömrük ərazisinə gətirilməzdən əvvəl elektron formada verilməməsinə görə, vəzifəli şəxslər min manat məbləğində, hüquqi şəxslər min beş yüz manat məbləğində cərimə edilir.
Həm “Karat Holding”lə bağlı, həm də “Karmen” MMC ilə bağlı iş baxılması üçün Yasamal rayon Məhkəməsinə göndərilib. Hər iki işə 30 yanvar tarixində baxılacaq. “Karat Holding”in işinə hakim Mirsadiq Seyidov, “Karmen”lə bağlı işə isə hakim Rəşad Cavadzadə sədrlik edəcək.
Qeyd edək ki, gömrük qaydalarını pozan “Karat Holding”ə tikinti, qida, sənaye, turizm və ticarət sahəsində ixtisaslaşmış – “Karat” MTK, “İdeal” MMC, “İzmir” MMC (tikinti şirkətləri); “Azinvest” Tikinti Şirkəti; “Everest-M”, “Şin Servis” (armatur alğı-satqısı); “Karmen” MMC (dəyirman və un alğı-satqısı); Hökməlidə Makaron Fabriki, Hökməlidə Kisə Fabriki; ASTEL MMC (Məhəmmədi, Mehdiabad və Şamaxıda Quşçuluq Fabrikləri), Taxıl Anbarları və Dəyirman Kompleksləri (Şəkidə, Kürdəmirdə, Marneulidə və Gürcüstanın müxtəlif bölgələrində); Gəncə Fatoğlu (un dəyirmanı); Bakı şəhəri Zərifə Əliyeva küçəsində 18 mərtəbəli iki “Marina Plaza” oteli; Zərifə Əliyeva küçəsində ikimərtəbəli restoran; Bakı şəhəri Səməd Vurğun küçəsində “Ağ Saray” Binası; Bakı şəhəri Xan Şuşinski küçəsi 12, İmran Qasımov küçəsi 16, Qulu Quliyev küçəsi 21, Süleyman Rüstəm küçəsi 61-də yerləşən 18 mərtəbəli dörd bina; İzmir küçəsi 7A və 7B-də yerləşən 19 mərtəbəli iki bina; Zərifə Əliyeva küçəsi 53-də yerləşən 23 mərtəbəli bir bina, Süleyman Rüstəm küçəsi 61-də yerləşən “Premium Market” daxildir.
“Karat Holding” və “Karmen” MMC sabiq deputat Əsabil Qasımova məxsusdur.
Qarşı tərəfi dinləməyə hazırıq.