Moskva, 23 yanvar, AZƏRTAC
Mixail Qusmanın “Hakimiyyət formulu” müsahibələr toplusunun beşinci cildi çapdan çıxıb.
AZƏRTAC TASS agentliyinə istinadla xəbər verir ki, agentliyin baş direktorunun birinci müavinin yeni kitabında onun Azərbaycanın Ümummilli Lideri Heydər Əliyev ilə müsahibəsindən parçalar da yer alıb.
Müəllifin 75 yaşının tamam olduğu gün işıq üzü görən kitabda 75 müsahibə var, onun çapdan çıxması isə “Hakimiyyət formulu” müəllif teleproqramının 25 illiyinə həsr olunub.
M.Qusman qeyd edib: “Teleproqramın gümüş yubileyi əlamətdar hadisədir. Bu 25 ilə ərzində biz dövlət və hökumət başçıları, krallar, prezidentlər, həmçinin böyük beynəlxalq təşkilatların rəhbərləri ilə təqribən 500 müsahibə hazırlamışıq. Söhbətlərin hamısı unikaldır, çünki nadir həmsöhbətlərlə aparılıb”.
Müəllif əmindir ki, onun qəhrəmanlarının portretləri mötəbər və inandırıcı olub, həmsöhbətlərin istedadını, biliklərini, böyük şəxsi keyfiyyətlərini əks etdirib.
“Hakimiyyət formulu” kitabının yeni cildində 2020-2024-cü illəri əhatə edən müsahibələr yer alıb. Jurnalistin həmsöhbətləri arasında Monako Knyazı II Alber, İsveç Kralı Karl XVI Qustav və kraliça Silviya, Danimarka kraliçası II Marqrete, Norveç Kralı V Harald, CXR-in Sədri Si Cinpin, Hindistanın Baş naziri Narendra Modi, BMT-nin Baş katibi Antonio Quterreş, həmçinin Avropa, postsovet məkanı və Afrikanın başqa liderləri olublar.
Fəridə Abdullayeva
AZƏRTAC-ın xüsusi müxbiri
Moskva
