Fransalı hücumçu Randal Kolo Muani PSJ-dən icarə müqaviləsi əsasında “Yuventus”a keçidi haqqında fikrini bildirib.
Arena.az “Football Italia” dərgisinə istinadən, fransalı futbolçunun bu barədə fikrini təqdim edir:
“Mən çox, bu əfsanəvi klubda, burada olmaqdan çox məmnunam. Mən fəxr edirəm ki, bu rəngləri daşıyır və bu klubun pərəstişkarları qarşısında oynayıram.
“Yuventus”un fransalı oyunçularından hansına daha çox heyranam? Tarixə düşmüş bir çox fransalı oyunçu var. Zinəddin Zidan, əlbəttə ki, David Trezeqe – mənim həqiqətən xoşuma gələn başqa birisidir. Dövrümüzə azacıq yaxın olan Pol Poqba, eləcə də burada çox yaxşı oynayan Kefren Türam, buna görə də mən burada olduğum üçün şadam.
Bir müddət texniki direktorla danışdım, burada oyunun tərzi haqqında mənə məlumat verdi və bu, məni burada müqavilə imzalamağa sövq etdi. Mən məşqlərə başlamaq və meydana çıxmağın intizarındayam”, deyə Kolo Muani vurğulayıb.
“Yuventus” Randal Kolo Muanini cari mövsümün sonuna qədər müddətə icarəyə götürüb. Randalın yarım illik icarəsi “Qoca sinyora”ya 3,6 milyon avro məbləğ müqabilində başa gəlib. Kolo Muani “byankoneri”nin heyətində “20” nömrə altında çıxış edəcək.
Randal Kolo Muani yeniyetməlik illərində “Vilpent”, “Tramble” və “Torsi” klublarında çıxış etdikdən sonra, “Nant”a yol tapıb və “bülbüllər”in heyətində böyük futbolda debüt edib. Ardınca “Bulyon”da icarə əsasında çıxış etmiş Kolo Muani daha sonra Frankfut “Ayntraxt”ının heyətində çıxışı ilə diqqət cəlb edib. PSJ 2023-cü iln sentyabr ayında fransalı futbolçunu 95 milyon avro məbləğ müqabilində “Ayntraxt”dan tamhüquqlu əsasda Paris klubunun düşərgəsinə qatıb. Kolo Muaninin Fransa nəhəngi ilə müqaviləsinin müddəti 2028-ci iliin iyun ayının sonuna qədər qüvvədədir.
Cari mövsümdə Kolo Muani PSJ üçün bütün yarışlarda 14 oyun keçirib, 2 qol vurub, 1 məhsuldar ötürmə verib.
Kolo Muaninin PSJ-nin heyətində çıxışının ümumi mənzərəsi 54 oyun, 11 qol və 7 məhsuldar ötürmədən ibarətdir.
Kolo Muani 2022-ci ilin sentyabrında debüt etdiyi Fransa yığmasının heyətində 27 oyun keçirib, 8 qol vurub və 4 məhsuldar ötürmə verib.
Kolo Muaninin qənimətlər muzeyində PSJ ilə 2023/2024-cü illər mövsümündə qazandığı Fransa Liqa 1 çempionluğu, Fransa Kuboku və Fransa Super Kuboku var. Kolo Muani həmçinin “Nant”la Fransa Kubokunun (2021/2022) qalibi olub.
Transfermarkt internet-portalı 26 yaşlı fransalı mərkəz hücumçusu Randal Kolo Muaninin transfer dəyərini 30 milyon avro məbləğində qiymətləndirir.
