“Real” baş məşqçisi Karlo Ançelotti “qaymaqlılar”ın yarımmüdafiəçisi Federiko Valverdenin oyun keyfiyyətlərini yüksək qiymətləndirib.
Arena.az AS dərgisinə istinadən, italyan mütəxəssisin uruqvaylı futbolçu ilə bağlı suala verdiyi cavabı təqdim edir:
– Valverdenin mövsümünü necə qiymətləndirirsiniz? O, bu komandada toxunulmaz futbolçudurmu?
– Aydındır ki, o, çox, çox vacib oyunçudur. “Fede” bir çox mövqelərdə çıxış edə bilər, hansı ki, bütün bunlarda mükəmməl oynayır: dayaq bölgəsində, cinahlarda. Onun kimi sağ cinah müdafiəçisi tapmaq çox çətindir.
Onun üçün daha yaxşı mövqe seçmək çətindir. Əgər bizim sağ cinah müdafiəçisi keyfiyyətlərinə daha çox ehtiyacımız varsa, onda Valverde orada oynayacaq. Əgər mərkəzdə oyunçu gərəkdirsə, o, ora çıxacaq. O, heç vaxt heç nə tələb etmir, bu, onun fəzilətidir. Hal-hazırda “Fede” dünyanın ən bütöv futbolçusudur.
Federiko Valverde 2017-ci ildən “Real”ın əsas komandasında çıxış edir. Valverde karyerasına “Penyarol”da başlayıb, 2015/2016-cı illər mövsümündə Uruqvay çempionluğunu qazanmış “Penyarol”da “Real”ın diqqətini çəkib və transfer edilərək, 2016/2017-ci illər mövsümünü “Real”ın “B” komandasında keçirib. 2017-ci ildə madridlilərin əsas komandasında debüt etmiş Valverde 2017/2018-ci illər mövsümünü “Deportivo La Korunya”da icarədə keçirib və növbəti mövsümdə “Real”a qayıdıb. Valverdenin “Kral klubu” ilə müqaviləsi 2029-cu ilin iyun ayının sonuna qədər qüvvədədir.
Cari mövsümdə Valverde “qaymaqlılar”ın heyətində 32 oyuna çıxıb, 8 qol vurub, 4 məhsuldar ötürmə verib.
Valverdenin “Real”da çıxışının ümumi mənzərəsi isə belədir: 291 oyun, 29 qol, 27 məhsuldar ötürmə.
Valverde “Kral klubu” ilə bütün mümkün klub yarışlarını qazanıb: İspaniya La Liqasının (2019/2020, 2021/2022, 2023/2024), İspaniya Kral Kubokunun (2022/2023), İspaniya Super Kubokunun (2019/2020, 2021/2022, 2023/2024), Çempionlar Liqasının (2021/2022, 2023/2024), UEFA Super Kubokunun (2022/2023, 2023/2024), FIFA Klub Dünya Kubokunun (2018, 2023), FIFA Qitələrarası Kubokun qalibi olub.
Valverde 2017-ci ilin sentyabrında debüt etdiyi Uruqvay yığmasının heyətində 67 oyun keçirib, 8 qol vurub, 2 məhsuldar ötürmə verib.
“Transfermarkt” internet-portalı 26 yaşlı uruqvaylı mərkəz yarımmüdafiəçisi Federiko Valverdenin transfer dəyərini 130 milyon avro məbləğində qiymətləndirir.
