Məşhur britaniyalı jurnalist Pirs Morqan “Əl-Nəsr”in portuqal ulduz hücumçusu Kristiano Ronaldo ilə söhbəti haqda xatirəsini paylaşıb.
Arena.az “Give me Sport” dərgisinə istinadən, Morqanın müvafiq xatirəsini təqdim edir:
“Mənim, Kristiano ilə çox maraqlı bir söhbətim olub. Üç il əvvəl ondan ilk dəfə müsahibə alandan sonra nahar etmişdik. Bu, çox gözəl söhbət idi və mən onu bir insan kimi çox bəyənirəm.
O, Messiyə inanılmaz dərəcədə hörmət bəsləyir və mən ondan soruşmuşdum: “İndiyə qədər gördüyün ən yaxşı oyunçu kimdir?”. O cavabladı: “Messi, amma sən xətalı sual verirsən, ən yaxşı oyunçunun kim olduğunu soruşma…”. Bu, məni xeyli güldürdü.
Bununla belə, o, daha sonra onların ikisi və eləcə də Ronaldo, Ronaldinyo, Corc Best, Pol Qaskoyn kimi bir çox digər böyük oyunçular arasındakı fərqlər haqqında xeyli danışdı. O, bildirdi ki, fərq onun və Messinin uzunmüddətli karyerasının olmasıdır”, deyə Morqan xatırlayıb.
Kristiano Ronaldo 2023-cü ilin yanvar ayından “Əl-Nəsr”də çıxış edir. Portuqal ulduz ərəb klubuna 2023-cü ilin yanvarında “Mançester Yunayted”dən azad agent qismində keçib.
Ronaldonun “Əl-Nəsr”lə müqaviləsi 2025-ci ilin iyun ayının sonuna qədər qüvvədədir.
Cari mövsümdə Ronaldo “Əl-Nəsr”in heyətində 22 oyuna 19 qol və 3 məhsuldar ötürmə ilə fərqlənib.
Kristianonun “Əl-Nəsr” karyerası ümumilikdə 86 oyun, 77 qol və 18 məhsuldar ötürmədən ibarətdir.
Ronaldo “Əl-Nəsr”dən öncə “Real”, “Mançester Yunayted”, “Yuventus”, “Sportinq” (Lissabon) komandalarında çıxış edib. Portuqal ulduz bu komandaların hər biri ilə çoxsaylı qənimətlər qazanıb, müxtəlif rekordlara imza atıb. Ronaldo “Əl-Nəsr”lə də Ərəb Klublarının Çempionlar Kubokunu (2023) qazanıb, həmçinin Səudiyyə Ərəbistanı Peşəkar Liqasının 2023/2024-cü illər mövsümünün ən sərrast qolçusu (35 qol) olub.
Ronaldo Portuqaliya yığmasının heyətində 215 oyuna 135 qol vurub və 45 məhsuldar ötürmə verib. Ronaldonun yığma komandanın heyətindəki oyun və qol sayı mütləq dünya rekordudur.
Ulduz futbolçu Portuqaliya yığmasının heyətində Avropa çempionatının (2016), UEFA Millətlər Liqasının (2019) qalibi, həmçinin Avropa çempionatını gümüş (2004) və bürünc (2012), FIFA Konfederasiyalar Kubokunun (2017) bürünc mükafatçısı olub.
