Bakı, 27 yanvar, AZƏRTAC
Bakı Gənclər Mərkəzinin 5 illik yubileyi təntənəli şəkildə qeyd edilib.
Mərkəzdən AZƏRTAC-a bildirilib ki, tədbir şəhidlərimizin əziz xatirəsinə ehtiram əlaməti olaraq bir dəqiqəlik sükutla və Azərbaycan Respublikasının Dövlət Himninin səsləndirilməsi ilə başlayıb.
Bakı Gənclər Mərkəzinin direktoru Nərgiz Babayeva açılış nitqi ilə çıxış edərək Mərkəzin 5 il ərzində həyata keçirdiyi layihələr, qazandığı uğurlar və gələcək hədəflər barədə geniş məlumat verib. Bununla yanaşı, Bakı Gənclər Mərkəzinin fəaliyyətini əks etdirən “Biz gəncliyin mənbəyiyik” jurnalı təqdim olunub.
Yubiley tədbiri gənclərin böyük həvəslə hazırladığı musiqi və rəqs səhnələri ilə yadda qalıb. Həmçinin Bakı Gənclər Mərkəzinin əməkdaşlarının ifasında səsləndirilən “Yubiley sədası” xüsusi maraq doğurub.
Tədbirdə Dövlət Gömrük Komitəsinin Akademiyasının rəisi gömrük xidməti general-mayoru Qulu Novruzov tərəfindən Mərkəzə xatirə hədiyyəsi təqdim olunub. Azərbaycanın incəsənət ustaları ifaları ilə tədbirə rəng qatıblar.
