Yanvarın 29-da Azərbaycan futbolunun fəxri Tofiq Bəhramovun 100 illik yubileyi olacaq. AFFA bu münasibətlə yubiley tədbirlərinə başlayıb. Əfsanəvi hakimin yubileyi münasibətilə poçt markası çap olunub.
Bu barədə Fanat.Az-a qurumun sözçüsü Elnur Məmmədli məlumat verib:
"AFFA-nın təşəbbüsü ilə “Azərpoçt” MMC tərəfindən yeni poçt markaları dövriyyəyə buraxılıb.
Yeni filateliya məhsulu Azərbaycanın əfsanəvi futbol hakimi Tofiq Bəhramovun 100 illik yubileyinə həsr olunub. Buraxılış 3 markadan ibarət blok şəklindədir.
Burada Tofiq Bəhramovun portreti, eləcə də hakimin fəaliyyətindən olan fotoları yer alıb.
AFFA-nın xüsusi sifarişi ilə ölkədə ilk dəfə futbol dünyasının əsas elementi sayılan futbol formalarını əks etdirən markalardan ibarət buklet də hazırlanıb.
Bundan başqa, Misli Premyer Liqasının 21-ci turunun oyunlarında Tofiq Bəhramov haqqında geniş məlumat veriləcək. Əfsanəvi hakimimizin xatirəsi yad ediləcək.
Futbol Veteranları İttifaqının da Tofiq Bəhramovun 100 illiyi ilə bağlı müəyyən tədbirləri nəzərdə tutulub.
Qeyd edim ki, Tofiq Bəhramovun 100 illiyi ilə bağlı növbəti aylarda da silsilə tədbirlərin keçirilməsi planlaşdırılır".
Mirağa
