BMT-nin İnkişaf Proqramının (UNDP) Azərbaycan Nümayəndəliyində UNDP-nin Audit və Tədqiqat Ofisi tərəfindən aparılmış audit yoxlaması zamanı ciddi qanun və maliyyə pozuntuları aşkara çıxmışdı.
Yoxlama nəticəsində UNDP-nin Azərbaycan Nümayəndəliyi 2023-cü ildə ölkədə 23 qeyri-hökumət təşkilatına (QHT) 29 layihə üzrə 754 570 dollar qrantlar verdiyi bəlli olub. Azərbaycan Nümayəndəliyi qrant vəsaitlərini həmin QHT-lərin yaratdıqları MMC-lərlə, yaxud QHT tərəfindən işə götürülmüş şəxslərlə birbaşa müqavilələr bağlayaraq şəxsi hesablara köçürüb.
Bununla bağlı araşdırma apararkən APA Agentliyi BMT-nin Azərbaycandakı nümayəndəliyinə, həmçinin də BMT-nin İnkişaf Proqramının (UNDP) Azərbaycandakı nümayəndəliyinə sorğu ünvanlayıb.
Sorğuda qeyd olunub: “BMT-nin İnkişaf Proqramının (UNDP) Audit və Tədqiqat Ofisi qurumun Azərbaycan nümayəndəliyinin 2023-cü ildə fəaliyyətinin auditinə həsr olunmuş hesabat hazırlayıb. Hesabatda UNDP-nin Azərbaycan nümayəndəliyi 2023-cü ildə ölkədə 23 QHT-yə dövlət qeydiyyatından keçirilmədən, QHT-nin işçiləri və ya onlar tərəfindən təsis edilmiş MMC-lər vasitəsilə 754 570 dollar dəyərində qrantlar verdiyi qeyd edilib. Ancaq həmin QHT-lərin və MMC-lərin adları açıqlanmayıb.
Bunu nəzərə alaraq, BMT-nin İnkişaf Proqramının (UNDP) Azərbaycan nümayəndəliyinin 2023-cü ildə QHT-nin işçiləri və ya onlar tərəfindən təsis edilmiş MMC-lər vasitəsilə 754 570 dollar dəyərində qrantlar verdiyi 23 QHT barədə (adları və qrantlara ayrılan vəsaitin məbləği) məlumat verməyinizi xahiş edirik”.
Qeyd edək ki, sorğuya UNDP-nin Azərbaycan nümayəndəliyi tərəfindən heç bir cavab verilməyib. Buna görə də 9 yanvar 2025-ci ildə BMT-nin İnkişaf Proqramının (UNDP) Mərkəzi Ofisinə ([email protected]) də eyni məzmunlu sorğu göndərilib. Təəssüf ki, bu günə qədər həmin sorğu da cavablandırılmayıb.
Qeyd edək ki, BMT-nin İnkişaf Proqramının (UNDP) Azərbaycan Nümayəndəliyində UNDP-nin Audit və Tədqiqat Ofisi tərəfindən aparılmış audit yoxlaması zamanı həm UNDP-nin qrantlarla bağlı şəffaflıq prinsiplərini, həm də Azərbaycan qanunvericiliyinin kobud şəkildə pozulduğu aşkarlanmışdı.
Audit yoxlamasından məlum olur ki, UNDP-nin Azərbaycan Nümayəndəliyi 2023-cü ildə ölkədə 23 qeyri-hökumət təşkilatına (QHT) 29 layihə üzrə 754 570 dollar qrantlar verib. Azərbaycan Nümayəndəliyi qrant vəsaitlərini həmin QHT-lərin yaratdıqları MMC-lərlə, yaxud QHT tərəfindən işə götürülmüş şəxslərlə birbaşa müqavilələr bağlayaraq şəxsi hesablara köçürüb. Daha sonra da bu qrantlardan müxtəlif məqsədlər üçün istifadə olunub.
Məsələ ondandır ki, bu qrantların heç biri Azərbaycan qanunvericiliyinə uyğun qaydada dövlət qeydiyyatından keçirilməyib. Yəni, qanunsuz vəsait kimi istifadə olunub. Hesabat sənədində qrant alan QHT-lərin və MMC-lərin adları açıqlanmayıb.
Hesabat sənədində o da qeyd olunub ki, UNDP-nin Azərbaycan Nümayəndəliyi2023-cü ildə Azərbaycanda “QHT-lərin bacarıqlarının artırılmasına” 1.3 milyon dollar, mina əleyhinə proqramın genişləndirilməsinə 1.3 milyon dollar vəsait ayırıb. Yenə də qrantları alan QHT-lər və onların MMC-ləri barədə məlumatlar sənəddə əksini tapmayıb.
Araşdırma UNDP-nin son illərdə Azərbaycanda Qadın Resurs Mərkəzləri yaratmağa həvəsli olduğunu da aşkara çıxarıb. Bu Mərkəzlərin hansı işlə məşğul olması heç kimə bəlli deyil. APA özəl mənbələrdən məlumat əldə edib ki, bir müddət əvvəl dövlət qurumları UNDP-nin Bakıdakı Qadın Resurs Mərkəzinin fəaliyyəti ilə tanış olmaq üçün ora baxış keçirmək istəsələr də, Mərkəzin direktoru qapıları bağlayıb və bildirib ki, UNDP içəri keçməyə icazə vermir.
UNDP-nin Audit və Tədqiqat Ofisinin hesabatında qadınlarla bağlı məqamlar bu baxımdan diqqətçəkicidir. Audit yoxlamasını aparanların özləri də şoka düşüb ki, müharibədən təsirlənmiş bir qrup qadına adi təlim keçirilməsi üçün 92 min dollarlıq (!) qrant layihəsi “icra olunub”. Maraqlıdır ki, 156 min manat dəyəri olan bu təlim nə barədədir, həmin qadınlar kimlərdir?
Sənəddə bu da açıqlanmayıb.
