“Qarabağ” Avropa Liqasının Liqa mərhələsində “Olimpiakos”a qarşı keçirəcəyi səfər matçı ilə əlaqədar azarkeşlərinə müraciət edib.
Arena.az xəbər verir ki, bu barədə Ağdam klubunun mətbuat xidməti məlumat yayıb.
Müraciətdə bildirilib ki, matçı Yunanıstandakı “Georgios Karaiskakis” stadionunda izləmək və komandanı dəstəkləmək istəyən azarkeşlər üçün ayrılmış vauçerlər bu gündən etibarən iTicket.az-da onlayn şəkildə satışa çıxarılıb.
Azarkeşlər əldə etdikləri vauçerləri oyun günü saat 19:00-dan 21:00-a kimi “Georgios Karaiskakis” stadionunun 27-ci sektorunun qarşısına yaxınlaşaraq biletə dəyişməlidirlər. Biletlərin qiyməti 50 AZN-dir.
Vauçerlər yalnız iTicket.az-da satışda olacaq. Stadionda vauçerlərin və biletlərin satışı olmayacaq. Vauçerləri əldə edən şəxslər onları biletə dəyişərkən şəxsiyyətini təsdiq edən sənədi təqdim etməlidirlər. Vauçeri əldə edən azarkeş şəxsi məlumatları şəxsiyyətini təsdiq edən sənəddə olduğu kimi doldurmalıdır.
Xatırladaq ki, “Olimpiakos” – “Qarabağ” oyunu yanvarın 30-da Yunanıstanda keçiriləcək. “Georgios Karaiskakis” stadionunda baş tutacaq görüşə yerli vaxtla saat 22:00-da start veriləcək.
