İspaniyanın “Valyadolid” klubunun syerra-leoneli mərkəz müdafiəçisi Cuma Ba tamhüquqlu əsasda “Mançester Siti”yə keçib.
Arena.az bu barədə “Mançester Siti”nin mətbuat xidmətinə istinadən məlumat verir.
“Şəhərlilər” keçidi rəsmiləşdirdikdən sonra Banı icarə müqaviləsi əssasında “Lans”a göndəriblər. Ba cari mövsümün – iyun ayının sonuna qədər “Lans” üçün tər tökəcək.
Banın keçidi “Mançester Siti”yə 6 milyon avro məbləğində sabit və 2 milyon avro məbləğində əlavə üstəliklər – ümumilikdə 8 milyon avro məbləğ müqabilində başa gəlib.
Cuma Ba futbola “Fritaun Cayant Akademi” klubunda qədəm qoyub. Daha sonra futbolçu “AİK Fritonq”un heyətində böyük futbolda debüt edib, “Fritonians SLİFA”, “Valyadolid”in “B” və əsas komandalarında oynayıb.
Cari mövsümün birinci dövrəsinəd Ba “Valyadolid”in heyətində məhsuldar fəaliyyəti ilə diqqət çəkmədiyi 13 oyun keçirib.
Cuma Ba Syerra-Leone yığmasının heyətinə dəvət almayıb. Ba həmçinin böyük futbolda hələ heç bir qənimət qazanmayıb.
“Transfermarkt” internet-portalı 18 yaşlı mərkəz müdafiəçisinin transfer dəyərini 1 milyon avro məbləğində qiymətləndirir.
“Mançester Siti” ABŞ klubu “Nyu York Siti”nin sol cinah müdafiəçisi Kristian Makfarlanı da heyətinə qatıb. Azad agent statusuna malik 18 yaşlı futbolçu ilə uzunmüddətli müqavilə imzalandığı diqqətə çatdırılıb.
Kristian Makfarlan həm İngiltərə, həm də ABŞ vətəndaşlığına malikdir. O, yetirməsi olduğu “Nyu York Siti”nin əsas komandasının heyətində 13 oyuna çıxıb, fərqlənə bilməyib.
Makfarlan İngiltərənin U-16, U-17 və U-18 yığmalarında oynayıb. O, 16 və 17 yaşlılardan ibarət ABŞ yığmalarının da formasını geyinib.
“Transfermarkt” internet-portalı 18 yaşlı müdafiəçinin transfer dəyərini 2 milyon avro məbləğində qiymətləndirir.
Cuma Banı “Mançester Siti”yə satmış “Valyadolid” yarımmüdafiəçisi Viktor Meseqeri də “Rasinq”ə icarəyə verib. 25 yaşlı ispan futbolçu cari mövsümün sonunadək icarədə olacaq.
“Real Mursiya”nın yetirməsi olan Viktor Meseqer “Mirandes”, “Qranada” kimi klublarda da çıxış edib. O, 2023-cü ildən formasını geyindiyi “Valyadolid”də 51 oyuna çıxıb, 11 qol vurub, 4 assistlə yadda qalıb.
“Transfermarkt” internet-portalı 25 yaşlı yarımmüdafiəçinin transfer dəyərini 2 milyon avro məbləğində qiymətləndirir.
