Fransanın “Strasburq” klubunun qvineyalı mərkəz müdafiəçisi Saidu Sov bundan sonra Liqa 1-in digər təmsilçisi “Nant”ın formasını geyinəcək.
Arena.az bu barədə “Nant”ın rəsmi saytına istinadən xəbər verir.
Sözügedən klub Qvineya yığmasının üzvünü cari mövsümün sonuna kimi icarəyə götürüb. Müqavilədə satınalmaya dair şərt nəzərdə tutulmayıb. Bu isə o deməkdir ki, 22 yaşlı futbolçu icarə müddəti bitəndən sonra yenə “Strasburq”un düşərgəsinə qayıdacaq.
Saidu Sov Fransanın digər klubu “Sent Etyen”in yetirməsidir. O, “Strasburq”a 2023-cü ilin avqust ayında 3 milyon avro müqabilində məhz “Sent Etyen”dən keçib. Sovun “Strasburq”la 2028-ci ilin 30 iyununadək nəzərdə tutulmuş müqaviləsi mövcuddur.
Müdafiəçi “Strasburq”un əsas komandasının heyətində meydana çıxdığı 25 oyuna 2 məhsuldar ötürmə müəllifi olub.
Saidu 2020-ci ilin oktyabr ayında debüt etdiyi Qvineya yığma komandasında 28 oyuna çıxıb, 1 qol da vurub.
“Strasburq” serbiyalı hücumçusu Miloş Lukoviçi də “Herenven”ə icarəyə verib. 19 yaşlı forvard da cari mövsümün sonunadək Niderland klubunda çıxış edəcək.
Miloş Lukoviç Serbiyanın İMT klubunun yetirməsidir. O, 2024-cü ilin yanvarında 4,7 milyon avro müqabilində “Strasburq”a keçib. Serb hücumçu indiyə qədər Liqa 1 təmsilçisində cəmi 2 matça çıxıb, fərqlənə bilməyib. Bu üzdən “Strasburq” onu daha öncə İMT-yə də icarəyə verib.
Serbiyanın U-19 yığmasında oynamış Lukoviç 2023-cü ilin sentyabrından U-21-ə cəlb olunur.
“Strasburq” gedənlərin əvəzində heyətinə yeni futbolçu da cəlb edib. Liqa 1 təmsilçisi İngiltərənin “Nottingem Forest” klubunun irlandiyalı müdafiəçisi Endryu Omobamideleni bu mövsümün sonunadək satınalma şərti ilə icarəyə götürüb.
22 yaşlı Omobamidele peşəkar karyerasına “Norviç Siti”də başlayıb. “Nottingem Forest” onu 2023-cü ilin sentyabrında 12,85 milyon avroya transfer edib. Mərkəz müdafiəçisi Premyer Liqa təmsilçisinin əsas komandasında meydana çıxdığı 15 oyunda 1 qol vurub. İrlandiyanın müxtəlif yığmalarında oynamış futbolçu 2021-ci ildən bu ölkənin əsas millisində çıxış edir. Müdafiəçi İrlandiya millisinin heyətində 10 oyuna çıxıb.
