İranda islahatçı xətt təmsilçiləri vitse-prezident Məhəmməd Cavad Zərifin müdafiəsini təşkil ediblər.
Bunu İran İslam Respublikası Partiyasının baş katibi, din xadimi Rəsul Montacabniya İRNA-ya müsahibəsində deyib.
O, M.Zərifə hücum edən şəxslərin geyimlərindən asılı olmayaraq bu şəxslərin niyyətinə və məqsədlərinə şübhə ilə yanaşdığını deyib.
Montacabniya məhkəmə sistemini vitse-prezidenti təhqir edənlər barəsində ölçü götürməyə çağırıb: “Söyüşlər, təhqirlər və hörmətsizliklər kimə yönəlməsindən asılı olmayaraq cinayətdir”.
İranın strateji məsələlər üzrə vitse-prezidenti Məhəmməd Cavad Zərif Davosda keçirilən Dünya İqtisadi Forumunda CNN-in müxbiri Fareed Zakarianın hicabla bağlı sualına cavabında deyib: “Tehran küçələrinə çıxsanız, qadınların saçlarını örtmədiyini görərsiniz. Bu, qanunsuzdur, ancaq hökumət qadınlara təzyiq etməmək qərarına gəlib”.
Bu açıqlamasından sonra mühafizəkar sayılan xəttin nümayəndələri və İran İnqilab Keşikçiləri Qvardiyasına (Sepah) bağlı KİV-lər M. Zərifin istefa verməyə çağırıblar. Hətta, onu monarxist olmaqda ittiham ediblər. Onların iddiasına görə, vitse-prezident vaxtı ilə şahın təhlükəsizlik təşkilatının (SAVAK) göndərişi ilə ABŞ-da təhsil alıb.
İran parlamentinin 60 deputatı M.C. Zəriflə bağlı Prezident Məsud Pezeşkiana şikayət edib. Onlar Zərifin strateji məsələlər üzrə prezident müavinin təyin edilməsinin qanunsuz olduğunu bildiriblər.
Məhəmməd Cavad Zərif isə onun istefasını tələb edənlərin davranışına “bu, onların hüququdur” - deyə cavab verib.
