Türkiyənin İğdır vilayətində Azərbaycanın Ümummilli Lideri Heydər Əliyev haqqında yazılan “İnsan Ürəyi ilə Heydər Baba” kitabının təqdimatı keçirilib.
“Report”un Türkiyə bürosu xəbər verir ki, jurnalist-yazar, prof. dr. Aysel Sadak İltaşın yazdığı kitabın təqdimat və imza günü İğdır Azərbaycan Evində təşkil olunub.
Proqrama İğdır Azərbaycan Evi Dərnəyinin sədri Serdar Ünsal, İğdır-Azərbaycan Dil, Tarix və Mədəniyyət Həmrəyliyini Yaşatma və Dəstəkləmə Dərnəyinin sədri Ziya Zakir Acar, İğdır Universitetinin prorektoru Rəcəb Gülşen, keçmiş bələdiyyə sədri Əli Ağrı, “Yeşil İğdır” qəzetinin baş redaktoru Cabbar Şıktaş, İgdır şəhər Sosial Müdafiə Təşkilatının sədri Reşat Eyikudoğramac, eləcə də bölgənin ziyalı ictimaiyyəti və kitabsevərlər qatılıb.
Kitab haqqında məlumat verən müəllif bildirib ki, Heydər Əliyevlə bağlı indiyədək bir çox kitab yazıb, bu dəfə isə Ümummilli Lideri ətrafının və dostlarının nöqteyi-nəzərindən bir şəxsiyyət kimi xarakterizə etməyə çalışıb: “Kitabın ərsəyə gəlməsi üçün onu yaxından tanıyan yüzlərlə insanla söhbət etdim. Ona görə də Ulu Öndərin dövlət xadimi olmaqla yanaşı, insanlara necə dəyər verməsi, qəlbləri oxuyan və oxşayan xarakteri kitabda geniş şəkildə öz əksini tapıb”.
Digər çıxışçılar da Heydər Əliyevi lider və şəxsiyyət kimi xarakterizə edərək onun Azərbaycan, Türkiyə və ümumilikdə Türk dünyası üçün göstərdiyi xidmətlərdən bəhs ediblər.
Təqdimat kitabın imzalanması və xatirə şəkillərinin çəkilməsi ilə başa çatıb.
