Azərbaycan Xalq Cümhuriyyətinin qurucularından biri Məmməd Əmin Rəsulzadənin anadan olmasından 141 il ötür.
Oxuməni.az APA-ya istinadən xəbər verir ki, M.E.Rəsulzadə 1884-cü il yanvarın 31-də Bakının Novxanı kəndində anadan olub.
Gəncliyində Sosial Demokratlarla birlikdə “Hümmet” təşkilatının yaradılmasında iştirak edib. 1909-cu ildə çar rejiminin təqiblərindən qaçaraq İrana mühacirət edir. Bir müddət bu ölkədə “İrane Nou” qəzetinin baş redaktoru vəzifəsində çalışıb, inqilab yatırıldıqdan sonra Türkiyəyə gedib.
1911-ci ildə Müsavat partiyasına daxil olub, dörd ildən sonra bu partiyanın mərkəzi komitəsinin sədri olub.
1918-ci ildə Rəsulzadə Fətəli xan Xoyski ilə birlikdə Şərqdə ilk respublikanın - ADR-in yaradıldığını elan etdi. 1920-ci il aprelin 28-də bolşeviklər tərəfindən həbs edilir. Bir müddət sonra Stalinin əmri ilə Rəsulzadə azad edilərək Moskvaya aparıldı. Stalinin təkidinə baxmayaraq o, sovet hökuməti ilə əməkdaşlıqdan imtina edərək ölkəni tərk etdi.
Məmməd Emin Rəsulzadə 1955-ci il martın 6-da Ankarada vəfat edib.
1992-ci il dekabrın 24-də Azərbaycan Prezidenti Əbülfəz Elçibəy “Totalitar sovet rejimi dövründə repressiyaya məruz qalmış görkəmli ictimai-siyasi xadim Məmməd Əmin Rəsulzadənin ailə üzvlərinin Azərbaycana qaytarılması və onların sosial və məişət problemlərinin həlli yolları haqqında” fərman imzalayıb.
1993-cü il dekabrın 29-da Azərbaycan Prezidenti Heydər Əliyev “Görkəmli ictimai-siyasi xadim Məmməd Əmin Rəsulzadənin anadan olmasının 110 illik yubileyinin keçirilməsi haqqında” sərəncam imzaladı.
Azərbaycan Prezidenti İlham Əliyev 2013-cü il noyabrın 22-də “Məmməd Əmin Rəsulzadənin 130 illik yubileyinin keçirilməsi haqqında” sərəncam imzalayıb. Sərəncama əsasən, respublikada və xaricdə yubiley tədbirləri keçirilib.
Prezident İlham Əliyev ADR-in yaranmasının 100 illiyi şərəfinə 2018-ci ili “ADR ili” elan edib.
Prezident İlham Əliyev Məmməd Əmin Rəsulzadənin 140 illik yubileyinin keçirilməsi haqqında Sərəncam imzalayıb.
Oxuməni.az
