Hər turistin səyahət zamanı özünəməxsus vərdişləri və ritualları var. Ancaq bəzi səyyahlar elə şeylər etdiklərini düşünürlər ki, bunu heç kim etmir - nəticədə, fərqlənmək istəyi bir çox insana xasdır.
HİT.az xəbər verir ki, "Reddit" platformasının istifadəçisi digər turistlərdən səyahətlər zamanı etdikləri qeyri-adi şeylər barədə soruşub. Cavablar isə olduqca maraqlı olub.
"Biz Meksika mətbəxini çox sevirik. Dünyanı gəzərkən həmin şəhərdə Meksika yeməklərinin yerli interpretasiyasını təqdim edən restoranlara gedirik. Bəzən bu, həqiqətən yaxşı Meksika restoranı olur, bəzən isə düşünürsən ki, görəsən, burada kimsə Meksika mətbəxinin nə olduğunu bilirmi? Maraqlıdır ki, bizim ən sevdiyimiz Meksika restoranı Latviya paytaxtı Riqada yerləşir", deyə müzakirənin müəllifi bildirib.
Digər bir istifadəçi isə fərqli ölkələrdəki mağazalardan təkrar istifadə oluna bilən alış-veriş torbaları alaraq onları suvenir kimi saxladığını deyib:
"Düşünürəm ki, bu, həm səyahətimi xatırlamağın əyləncəli bir üsuludur, həm də onlardan faydalı şəkildə istifadə edirəm".
Başqa bir istifadəçi isə səyahət zamanı aldığı geyimlərin artıq qarderobunun əsas hissəsinə çevrildiyini söyləyib:
"Hazırda demək olar ki, bütün geyimlərimi səyahət zamanı almışam. Bu, mənə eklektik bir qarderob və eyni zamanda səyahətlərimi xatırladacaq funksional əşyalar verir. Bir gün və ya axşam geyimimi seçərkən üç-dörd qitəni əhatə edən kombinasiya yarada bilərəm və paltarlarımı geyinərkən o yerləri və səyahətlərimi xatırlamağı sevirəm".
Ancaq yazısının altına gələn təxminən qırx şərhə baxdıqda, məlum olub ki, bu cür vərdiş təkcə ona xas deyil.
Başqa bir istifadəçi getdiyi hər şəhərdə "Ulduz müharibələri" fanatlarının yerli icma üzvləri ilə görüşməyə çalışır. Görüşlər zamanı onlar öz ölkələrindən gətirdikləri tematik suvenirləri mübadilə edir və müxtəlif maraqlı hekayələr bölüşürlər:
"Bu, yerli sakinlərlə ünsiyyət qurmaq üçün əla üsuldur, çünki ən azı bir ortaq marağımız olur".
"Özümə poçt açıqcası göndərirəm. Onu adətən səyahətimin ikinci günündə yollayıram və sonra kimin birinci evə qayıdacağını 'yarışdırıram'. Adətən mən qalib gəlirəm, çünki beynəlxalq poçt çox yavaş işləyir. Açıqcanı aldıqda, səyahətimin ilk təəssüratlarını yenidən yaşamaq şansı əldə edirəm. Daha sonra isə onu Milad bəzəyinə çevirirəm", deyə başqa bir turist yazıb.
Bundan əlavə, istifadəçilər öz qeyri-adi səyahət vərdişləri arasında botanik bağları ziyarət etməyi, məzarlıqlarda gəzintiyə çıxmağı, yerli supermarketlərin məhsul çeşidini araşdırmağı, şəhər futbol stadionlarını görməyi və digər fəaliyyətləri sadalayıblar. Lakin yazılan şərhlərə əsasən, bu vərdişlərin də çox insana xas olduğu məlum olub.
Samir
