Azərbaycanın aparıcı qonaqpərvərlik aktivlərinin idarəetmə şirkəti olan "TABIA Group" və dünya üzrə tanınmış hotellər brendi "Hilton" əməkdaşlıq memorandumunu imzalayıb.
Memorandum "TABIA Group"un baş icraçı direktoru və İdarə heyətinin sədri Uygar Koçaş və "Hilton"un Mərkəzi, Şərqi Avropa və Almaniya üzrə İnkişaf üzrə vitse-prezidenti Mike Collini tərəfindən "TABIA Group" tərəfindən idarə olunan və yeni açılmış "Hilton Garden Inn Baku" hotelində imzalanıb.
Razılaşmaya əsasən, "TABIA Group"un idarəçiliyində olan iki şəhər mehmanxanası tezliklə "Curio Collection by Hilton" və "DoubleTree by Hilton" brendləri altında bazara təqdim olunacaq.
"TABIA Group"un baş icraçı direktoru və İdarə heyətinin sədri Uygar Koçaş bu tərəfdaşlığın əhəmiyyətini vurğulayaraq bildirib:
"Hilton" ilə əməkdaşlığımız, Azərbaycanın qonaqpərvərlik sənayesində keyfiyyət və müxtəlifliyi artırmaq istiqamətində uzunmüddətli strategiyamızın əsas mərhələlərindən biridir. "Curio Collection" və "DoubleTree" kimi qlobal brendlərin portfelimizə əlavə olunması ilə biz bazara unikal xidmətlər, fərqli qonaq təcrübələri və həm yerli, həm də beynəlxalq səyahətçilər üçün yeni imkanlar təqdim edirik".
"Hilton"un Mərkəzi, Şərqi Avropa və Almaniya üzrə İnkişaf üzrə vitse-prezidenti Mike Collini isə deyib:
"Hilton" dinamik bazarlarda, o cümlədən Azərbaycanda inkişafını genişləndirməyə uzunmüddətli sadiqliyini davam etdirir. Qonaqpərvərlik sahəsində uğurlu təcrübəyə malik "TABIA Group" ilə tərəfdaşlıq bizə "Curio Collection" və "DoubleTree" kimi tanınmış qlobal brendlərimizi bu inkişaf edən bazara gətirmək imkanı yaradır. Biz qonaqlarımızı bu yeni mehmanxanalarda qarşılamaq üçün səbirsizliklə gözləyirik".
2016-cı ildə "PMD Hospitality" adı ilə təsis edilən və sonradan yenidən brendləşdirilən "TABIA Group", Azərbaycanın qonaqpərvərlik aktivlərinin idarə edilməsi şirkətidir. Şirkət şəhər mehmanxanaları, kurortlar və sağlamlıq hotellərini əhatə edən geniş portfeli ilə qonaq təcrübəsini, rifahı və dayanıqlı inkişafı ön planda tutan innovativ həllər təqdim edir. "TABIA Group" strateji tərəfdaşlıqlar sayəsində Azərbaycanın qonaqpərvərlik sənayesində yeni standartlar müəyyən etməyə davam edir.
