Bakı, 18 mart, AZƏRTAC
Fövqəladə Hallar Nazirliyinin Dövlət Yanğın Nəzarəti Xidməti Novruz bayramı münasibətilə keçirilən mərasimlərdə yanğın təhlükəsizliyinin təmin olunması məqsədilə yanğına qarşı təbliğat və nəzarət tədbirlərini daha da gücləndirib.
Nazirliyin mətbuat xidmətindən AZƏRTAC-a verilən məlumata görə, Xidmətin əməkdaşları paytaxtın Binəqədi rayonunda müvəqqəti yerləşən Şuşa Dövlət Musiqili Dram Teatrında, Suraxanı rayonunda yerləşən “Atəşgah Məbədi” Dövlət Tarix-Memarlıq Qoruğunda, Səbail rayonunda yerləşən “Torpaq əlimdə, bahar ürəyimdə” xeyriyyə yarmarkasında və “Qoşa qala qapısı” meydanında maarifləndirmə tədbirləri keçiriblər.
Tədbirlərdə mərasim keçirilən obyektlərdə ehtiyat çıxış yollarının tutulmasının, zallara normadan artıq insan buraxılmasının və pirotexniki vasitələrdən istifadə olunmasının yolverilməzliyi diqqətə çatırılıb. Həmçinin bayram tonqalının ev, avtomobil və elektrik naqiliindən kənarda yandırılmasının, tonqalın ətrafında azyaşlıların böyüklərin nəzarətində saxlanılmasının, obyektlərin ilkin yanğınsöndürmə vasitələri ilə təmin edilməsinin vacibliyi vurğulanıb.
Eyni zamanda, tədbirlərdə mövzu ilə bağlı geniş müzakirələr aparılıb, suallar cavablandırılıb, ilkin yanğınsöndürmə vasitələrindən istifadə qaydaları əyani nümayiş olunub, yaddaş kitabçaları, buklet və posterlər paylanılıb.
