2025-ci ilin ilk aylarında Rusiyanın elektrik enerjisi ixracı azalma tendensiyasını davam etdirib. “Kommersant” yazır ki, Çinə daşınmalar 2024-cü ildəki rekord aşağı səviyyələrdən sonra bu il azalmağa davam edib. Azalma Rusiyanın Uzaq Şərq regionunda enerji istehsalında tədarük çatışmazlığı və yerli istehlakın artması ilə müəyyən edilib. Qazaxıstana ixracda daxili tələbatın azalması və yerli istehsalın artması təsirli olur.
Hafta.az-ın yazdığına görə, 2025-ci ilin yanvar-fevral dövründə Çinə elektrik enerjisi ixracı ötən illə müqayisədə 18 faiz azalaraq 130 milyon kilovatsaata düşüb. Həmin dövrdə daşınmanın pul dəyəri 20 faiz azalaraq 5,92 milyon dollar olub. Qazaxıstana ixrac da eyni şəkildə azalıb: 2025-ci ilin yanvarında bu ölkəyə 253,5 milyon kilovatsaat elektrik enerjisi satılıb. Ötən ilin eyni ayında bu rəqəm 354 milyon kilovatsaat olub. Belə ki, Qazaxıstana ixrac illik bazda 28 faiz azalıb.
2024-cü ildə Rusiyanın ümumi elektrik enerjisi ixracı 17,6 faiz azalaraq 8,53 milyard kilovatsaata düşüb. Bu dövrdə Çinə daşınmalar 70 faiz azalaraq cəmi 0,9 milyard kilovatsaata çatıb. Bu rəqəm 2010-2020-ci illər arasında orta illik 3 milyard kVt/saat səviyyəsindən xeyli aşağıdır. Çin bazarındakı bu kəskin azalma əsasən Uzaq Şərqdə istehsal gücü çatışmazlığı ilə bağlı olub. Müqayisə üçün, Qazaxıstan 2024-cü ildə 4,6 milyard kVt/saatla Rusiyanın ən böyük elektrik enerjisi alıcısı olub.
Ekspertlər 2025-ci ilə qədər Qazaxıstanda elektrik enerjisi kəsirinin dərinləşəcəyini gözləyirlər. Bu il elektrik enerjisi təchizatı kəsirinin 5,7 milyard kilovatsaatadək artacağı və bu çatışmazlığın Rusiyadan idxal hesabına böyük ölçüdə aradan qaldırılacağı təxmin edilir. Bu ssenari reallaşarsa, Rusiyanın Qazaxıstana elektrik enerjisi ixracı 77 faiz artaraq 5,5 milyard kilovatsaata çata bilər. Lakin xüsusilə pik saatlarda qiymətlərin artması və təklifin məhdudlaşdırılması bu prosesi çətinləşdirə bilər.
