Hurriyyet.az xəbər verir ki, Macarıstanın Baş naziri Viktor Orban yerli radiodakı çıxışında Avropa İttifaqının liderlərinin Rusiya ilə hərbi münaqişəyə hazırlaşdıqlarını, lakin bunun üçün heç bir əsas olmadığını söyləyib.
Orban ölkə vətəndaşlarını Macarıstanın heç bir halda belə bir müharibəyə qoşulmayacağına inandırıb.
Baş nazir deyib: "Mən görürəm ki, Brüssel müharibəyə hazırlaşır. Belə bir vəziyyətdə ən qorxulusu bu insanların başında baş verənlərdir".
Orban Aİ rəhbərliyinin Avropa ölkələrinin əhalisinə Rusiya ilə qarşıdurma zamanı 72 saat davam edəcək su, ərzaq və dərman ehtiyatı hazırlamaq çağırışlarını şərh edərkən, belə hissləri həm narahatlıq doğuran, həm də gülünc hesab etdiyini söyləyib: "Çünki, bu, bir tərəfdən Brüsselin özünün müharibəyə hazırlaşdığını göstərir, digər tərəfdən isə müharibə üçün heç bir əsası yoxdur".
Onun fikrincə, bu cür spekulyasiyalar yalnız ona görə yaranır ki, “Brüssel müharibəni davam etdirmək istəyir və Ukraynaya hərbi yardım göstərməkdə davam edir".
"Macarıstan müharibədən kənarda qaldı. Biz sülhün tərəfindəyik. Biz nə silah veririk, nə də əsgər göndəririk. Lakin Aİ-də Brüsselin dəstəyi ilə bu müharibəyə getdikcə daha çox qoşulmaq istəyən ölkələr var və mən hazırda siyasi hazırlıq getdiyini görürəm".
Onun fikrincə, Rusiya ilə münaqişə zamanı 72 saat davam gətirmək üçün su, qida, dərman və lazım olan hər şeyi hazırlamaq çağırışları məhz buna görədir.
Orban xalqı əmin edib: "Macar ailələrinə demək istərdim ki, fövqəladə bir şey etmək məcburiyyətində deyillər. Müharibə təhlükəsi yoxdur. Macarıstan heç kimlə vuruşmayacaq. Biz sülhün tərəfində qalacağıq və təhlükəsiz olacağıq. Əgər Avropa müharibəyə qoşulsada, biz təbii ki, bunu etməyəcəyik".
Hürr Tərcüman
