"Ukraynada atəşkəsin dayandırılması Baltik regionunda Rusiya təhdidini gücləndirəcək..."
Baltikyanı ölkələr Ukraynada döyüşlərin dayandırılmasının Rusiyaya hərbi təchizatı artırmağa və qoşunları sərhədlərinə köçürməyə vaxt verəcəyindən narahatdır.
Moderator.az xəbər verir ki, bu barədə "Financial Times" nəşri yazıb.
Məlumatda deyilir ku, Baltikyanı ölkələrinin müdafiə nazirləri Ukraynada atəşkəsin dayandırılmasının region üçün təhlükəsizliyi ciddi şəkildə artıracağını xəbərdar edib, çünki Rusiya hərbi təchizatın artırılması və qoşunların NATO-nun şimal-şərq sərhədinə köçürülməsi planlarını davam etdirəcək.
Nəşrin yazdığına görə, Estoniya, Latviya və Litva Moskvanın Ukraynada dayanmayacağına və Kremlin artıq hərbi istehsalın artırılması və əlavə qoşunların onların sərhədləri boyunca yerləşdirilməsi planlarını nəzərdə tutduğuna narahatdır.
"Biz hamımız başa düşürük ki, Ukraynada müharibə dayandırılanda Rusiya çox sürətlə öz qüvvələrini yenidən yerləşdirəcək. Bu o deməkdir ki, təhdid səviyyəsi də çox sürətlə artacaq", - Estoniya müdafiə naziri Hanno Pefkur nəşrə verdiyi müsahibəsində bildirib.
Litva müdafiə naziri Dovile Şakalene bu yaxınlarda Böyük Britaniyaya etdiyi səfər zamanı oxşar fikirlər səsləndirib: "Yalanlara qapılmayaq. Gəlin özümüzü aldatmayaq ki, Rusiya Ukraynadan sonra bitəcək. Rusiya atəşkəsdən sonra hərbi potensialını artırmaq üçün vaxtdan istifadə edəcək. Onların artıq böyük və döyüşə hazır bir ordusu var və bu ordunun sayı daha da artacaq".
Pefkur hazırda Ukraynada olan 600 min rus hərbçisinin 300 mininin digər sahələrə köçürüləcəyini düşünür. "Bu insanlar Rusiyanın müxtəlif bölgələrinə qayıtmayacaq, kənddə qarğıdalı yığmaq və ya başqa işlər görmək üçün qayıtmayacaq, çünki orduya aldıqları maaş öz şəhərlərində ala biləcəklərindən 5-10 dəfə daha çoxdur", - o, qeyd edib.
Baltik ölkələri bu payızda onların sərhədlərinə yaxın Rusiya və Belarusda keçiriləcək "Qərb" hərbi təlimlərindən də çox narahatdır. Bu təlimlər NATO ölkələri ilə müharibə simulyasiyasını əhatə edir və on minlərlə hərbçi, tank, təyyarə və artilleriyanı ehtiva edir.
NATO-nun Şərq cinahındakı ölkələr, Polşa və Rumıniya daxil olmaqla, öz təhlükəsizlikləri hesabına Ukraynada qoşun yerləşdirmə öhdəliklərini götürə bilməyəcəklərini bildirib. Onlar həmçinin NATO-nun hərbi qüvvələrinin öz ölkələrindən Ukraynaya sülhməramlı qüvvələr göndərməsi ilə bağlı xəbərdarlıq edib.
"Biz Şərq cinahının təhlükəsizliyini riskə ata bilmərik. Biz öz qüvvələrimizin Ukraynada hansısa şəkildə möhkəmləndirilməsinə razı ola bilmərik. O zaman sərhədimizdə risklər yaranacaq", - Pefkur deyib.
NATO Rusiya hücumunu gözləyir
Ötən gün Litva prezidenti Qitanas Nauseda bildirib ki, ölkəsi 2030-cu ilə qədər Rusiyanın NATO ölkələrinə hücum etməsinə hazırlaşır. Almaniya kəşfiyyatında da qeyd olunub ki, Rusiya artıq bu onilliyin sonuna qədər NATO ilə böyük müharibəyə hazır ola bilər.
Bundan əlavə, Polşa Milli Təhlükəsizlik Bürosunun rəhbəri general Darius Lukovski bildirib ki, Rusiya ilə müharibə halında Polşa yalnız bir-iki həftə dözə biləcək, sonra isə onun sursatı tükənəcək. Bəzi silah növləri isə ölkəyə yalnız 5 gün yetərli olacaq.
